Uddhav Thackeray News : ठाकरे गटाची गळती थांबेना; बीएमसी निवडणुकीआधी 'जोर का झटका'!

Mumbai News : ठाकरे गटाच्या शिलेदारांना आपल्याकडे वळविण्याच्या धक्कातंत्राची मुख्यमंत्री एकनाथ शिंदेंची मालिका अजूनही सुरूच आहे. मुंबई महापालिकेत ठाकरेंचे हात बळकट केलेल्या माजी नगरसेवकांना साऱ्याच प्रकारची ताकद देण्याचा शब्द देत, शिंदे यांनी आतापर्यंत ४०-४५ माजी नगरसेवक फोडले. त्यात आता अनेक टर्म नगरसेवक राहिलेले ठाकरे गटाचे नेते मंगेश सातमकर यांचीही भर पडली आहे. पुढच्या काही दिवसांत महापालिका निवडणुकांच्या तयारीला वेग येऊ शकतो; त्याआधीच शिंदे मुंबईत शिवसेनेचा विस्तार करीत आहेत.

ठाकरे गटाचे नेते असलेले माजी नगरसेवक मंगेश सातमकर यांचा आता मुख्यमंत्री एकनाथ शिंदेच्या शिवसेनेत प्रवेश होणार आहे. शिंदे यांच्या उपस्थितीत त्यांचा पक्षप्रवेश हपार पडणार आहे. मुंबईतील एक महत्त्वपूर्ण मोहरा ठाकरे गटाला रामराम केल्यामुळे हा उद्धव ठाकरेंना मोठा धक्का मानला जातो.

कोण आहेत सातमकर?

मंगेश सातमकर मागील अनेक टर्म नगरसेवरक राहिलेले आहेत. मुंबई महानगरपालिकेच्या शिक्षण समितीचे ते अध्यक्षही राहिलेले आहेत. स्थायी समिती आणि इतरही अनेक समित्यांवर त्यांनी काम केलेले आहे. २०१४ मध्ये सातमकर यांनी सायन कोळीवाडा मधून विधानसभेची निवडणूक लढवली होती.

१९९४ मध्ये ते पहिल्यांदा मुंबई मनपात नगरसेवक म्हणून निवडून आले होते. यानंतर २००२, २००७, २०१७ मध्ये ते महानगरपालिकेच्या निवडणूक त्यांनी जिकली होती. सातमकरांनी अनेक वर्षे बीएमसी शिक्षण समितीवर अध्यक्षही राहिले होते.