Vasai-Virar Municipal Reservation : साडेपाच वर्षांची प्रतीक्षा संपली! वसई-विरार आरक्षण सोडतः 58 जागा महिलांसाठी; 16 प्रभागात फक्त एकच सर्वसाधारण पुरुष जागा!

विजय गायकवाड

Vasai-Virar News : वसई-विरार शहर महापालिकेच्या सार्वत्रिक निवडणूक 2025 च्या प्रभागाची आरक्षण सोडत जाहीर झाली आहे. आरक्षण सोडतात महिला आरक्षण आणि महिला राखीव जागेचा फटका सर्वसाधारण पुरुषांना बसला असून, 16 प्रभागात केवळ एकच जागा सर्वसाधारण पुरुषांना सुटल्या आहेत तर 20 नंबरच्या प्रभागात सर्व आरक्षण पडले असल्याने सर्वसाधारण गटाला संधी मिळणार नाही.

या महापालिका निवडणुकीत सर्वसाधारण गटात नगरसेवक बनण्यासाठी पुरुषांची मोठी स्पर्धा ही पाहायला मिळणार असून अनेकांचा हिरमोड होणार आहे. तर अनेक पक्षांना सक्षम महिला उमेदवार शोधण्यासाठी तारेवरची कसरत करावी लागणार आहे.

28 जून 2020 ला वसई-विरार महापालिकेचा कार्यकाळ संपल्या नंतर तब्बल साडे पाच वर्षे पालिकेचा कारभार प्रशासकाच्या हातून चालविल्या जात होता. या निवडणुकीत अनेकांनी नगरसेवक होण्याचे स्वप्न पाहिले आहे. त्यामुळे महापालिका आरक्षण सोडतिकडे अनेकांचे डोळे लागले होते. एकदाची प्रतीक्षा संपून आज अखेर महापालिकेची आरक्षण सोडत पार पडली आहे.

115 सदस्य आणि 29 प्रभागासाठी ही आरक्षण सोडत करण्यात आली आहे. यात अनुसूचित जाती (sc) साठी 05 यातील 3 जागा महिलांसाठी आरक्षित आहेत. अनुसूचित जमाती साठी (एसटी) 05 यातील 3 जागा महिलांसाठी राखीव आहेत.

नागरिकांचा मागास प्रवर्ग (obc) साठी 31 जागा आणि यातील 16 जागा ह्या महिलांसाठी आरक्षित करण्यात आल्या आहेत. तर सर्वसाधारण (open) साठी 74 जागा असून, 36 जागा या महिलांसाठी आरक्षित झाल्या आहेत. 115 नगरसेवका पैकी आरक्षण निहाय 58 जागा या महिलासाठी आरक्षित करण्यात आल्या आहेत.

'या' प्रभागात सर्वसाधारण पुरुष नाही

ग क्रमांक २० मधील अ जागा अनुसूचित प्रवर्गासाठी आरक्षित असून, ब जागा अनुसूचित जमातीसाठी आरक्षित झाली आहे . तर महिला आरक्षणाच्या सोडतीत या प्रभागातील उर्वरित दोन्ही जागा महिलांसाठी गेल्या आहेत. क जागा नागरिकांच्या मागास प्रवर्ग महिला आणि ड जागा सर्वसाधारण महिलेसाठी आरक्षित झाली आहे. त्यामुळे या प्रभागात सर्वसाधारण पुरुष उमेदवाराला एकही जागा शिल्लक नाही. परिणामी या प्रभागात तयारी केलेल्या सर्वसाधारण पुरुषांना आता उमेदवारीसाठी दुसरा प्रभाग शोधावा लागणार आहे.