Balasaheb Thorat News: राजीनामा मागे घेणार? बाळासाहेब थोरातांचे सूचक वक्तव्य...

Maharashtra Politics News: ''प्रत्येक पक्षात काहीना काही मतभेद असतात. मग डॅमेज कंट्रोलचा प्रश्नच उद्भवत नाही. पक्ष पुढे घेऊन जाण्यासाठी जे काही करता येईल ते आम्ही करु,'' अशी प्रतिक्रीया माजी मंत्री आणि काँग्रेसचे वरिष्ठ नेते बाळासाहेब थोरात यांनी दिली आहे. एका वृत्तवाहिनीला दिलेल्या मुलाखतीत ते बोलत होते.

बाळासाहेब थोरात यांनी काँग्रेस विधिमंडळ नेतेपदाचा राजीनामा दिला होता. विधानपरिषद निवडणूक व अपक्ष आमदार सत्यजीत तांबेंबाबत नाशिक पदवीधर निवडणुकी दरम्यान काँग्रेसमध्ये अनेक राजकीय घडामोडी घडून आले. दरम्यान थोरात यांनी राजीनामा दिल्याने काँग्रेस अंतर्गत धुसफूस सुरू असल्याचे स्पष्ट होत होते.

कॉंग्रेसमधील हे डॅमेज कंट्रोल करण्यासाठी काँग्रेस महाराष्ट्र प्रभारी एच के पाटील यांनी मुंबईत बाळासाहेब थोरात यांच्याशी सविस्तर चर्चा केली. रविवारी (१२ फेब्रुवारी) काँग्रेस महाराष्ट्र प्रभारी एच के पाटील आणि काँग्रेसचे नेते ज्येष्ठ नेते बाळासाहेब थोरात यांची आज नुकतीच बैठक पार पडली. त्यानंतर माध्यमांनी त्यांना राजीनामा मागे घेणार का, तुम्ही नाना पटोलेंशी बोलणार का, असा सवाल विचारला. या प्रश्नाला उत्तर देताना ते म्हणाले की, आमच्यातील चर्चा तुम्हाला सांगू शकत नाही. पक्षाध्यक्ष मल्लिकार्जुन खर्गे यांना पत्रातून मी माझी खंत मांडली होती. आता मी त्यांना भेटण्यासाठी दिल्लीत जाणार आहे. ते आमच्या पक्षाचे प्रदेशाध्यक्ष आहेत.

सत्यजीत तांबे आणि सुधीर तांबे यांचे निलंबन हे षडयंत्र असल्याचा आरोप त्यांच्याकडून करण्यात येत आहे, असा सवाल त्यांना विचारला असता बाळासाहेब थोरात म्हणाले की, आता ते सर्व सोडून द्या, जे झालं ते झालं. आता आम्ही फक्त पक्षाला पुढे घेऊन जाणार आहोत. त्याचवेळी मल्लिकार्जुन खर्गे यांना भेटल्यानंतर या वाद संपू शकतो, असे सूचक वक्तव्यही बाळासाहेब थोरात यांनी केलं आहे.

तसेच, "कॉंग्रेस कुटुंबातल्या अंतर्गत बाबी आहेत. पाटील यांनी माझ्याशी सविस्तर चर्चा केली. काँग्रेसच्या रायपूरच्या परिषेदेसाठी मी उपस्थित राहिलं पाहिजे असे ते म्हणाले. यावेळी मी पक्षाचे अध्यक्ष, नेते राहुल गांधी, नेत्या सोनिया गांधी यांच्यासमोर सविस्तर चर्चा करणार आहे.