कोपरगावमध्ये  भाजप आमदार कोल्हे व राष्ट्रवादीचे काळे यांच्या समर्थकांत हाणामारी

नगर :  कोपरगावमध्ये आज शनिवारी  राष्ट्रवादी काॅग्रेस व भारतीय जनता पक्षाच्या कार्यकर्त्यांत जोरदार हाणामारी झाली.

याबाबत सायंकाळी उशिरा भाजपच्या आमदार स्नेहलता कोल्हे व राष्ट्रवादीचे युवा नेते आशुतोष काळे यांच्या कार्यकर्त्यांनी कोपरगाव पोलिस ठाण्यात एकमेकांविरोधात फिर्याद दाखल होऊन गुन्हे दाखल झाले.

राष्ट्रवादी काॅग्रेसचे काल हल्लाबोल आंदोलन झाले. या आंदोलनात युवा नेते आशुतोष काळे यांनी भाजपच्या आमदार स्नेहलता कोल्हे व संजीवनी कारखान्याचे अध्यक्ष बिपीन कोल्हे यांच्यावर आरोप केले. हे आरोप घृणास्पद आहेत, या कारणावरून भाजपच्या कार्यकर्त्यांत कालपासून चीड  निर्माण झाली होती. आज दुपारी काळे यांच्या वक्तव्याचा निषेध करीत भाजपचे नेते,कार्यकर्ते, महिला आघाडीच्या कार्यकर्त्या महिला आदी तहसीलदारांना निवेदन जाण्यासाठी जात असताना काळे यांच्या प्रतिकात्मक पुतळाही दहन  करण्यासाठी घेऊन जात होते.

याच दरम्यान राष्ट्रवादीचे कार्यकर्ते श्री छत्रपती शिवाजी महाराज यांच्याबद्दल अपशब्द वापरलेले श्रीपाद छिंदम याच्या पुतळ्याचे दहन करण्यासाठी शिवाजी पुतळ्याजवळ जमले होते. या वेळी भाजपचे नेते या परिसरातून राष्ट्रवादीच्या काळे यांचा पुतळा घेऊन घोषणा देऊन जाताना घोषणा देत असल्याचे कार्यकर्त्यांच्या लक्षात आले. राष्ट्रवादीच्या कार्यकर्त्यांनी भाजपच्या कार्यकर्त्यांना जाब विचारून काळे यांच्या पुतळ्याचे दहन करू नका, असे सांगितले.

 या वेळी दोन्ही बाजुंनी वादात रुपांतर होऊन मारामारी सुरू झाली. या वेळी पुतळ्याच्या काठ्या काढून मारामारी झाली. या बाबत दोन्ही गटांच्या कार्यकर्त्यांच्या दिवसभर फिर्याद देण्याबाबत हालचाली सुरू होत्या. मात्र संध्याकाळी उशिरा कोपरगाव पोलिस ठाण्यात दोन्ही गटांच्या कार्यकर्त्यांकडून एकमेकांविरोधात फिर्याद दाखल झाल्या. या घटनेमुळे कोपरगाव शहरात पोलिसांचा फाैजफाटा दाखल झाला आहे.

 फिर्यादी दाखल

भाजप कार्यकर्त्यांनी दिलेल्या फिर्यादीवरून राष्ट्रवादी काॅग्रेसचे कार्यकर्ते संदीप वर्पे, समीर वर्पे, सुनील गुंगले, वाल्मिक लहिरे,हिरामन गुंगले यांच्या विरोधात गुन्हा दाखल झाला. फिर्यादत भाजप नगरसेवकांना, महिलांना धक्काबुक्की केली, महिलांना लज्जास्पद वर्तन केले, लाकडी दांडे व चाकूसारख्या हत्याराने हल्ला केल्याचे म्हटले आहे.

दुसरी फिर्याद राष्ट्रवादी काॅग्रेसच्या कार्यकर्त्यांनी दिली. त्यावरून भाजपचे माजी नगराध्यक्ष राजेंद्र सोनवणे, उपनगराध्यक्ष विजय वाजे, पराग संधान, फिरोज पठाण, रवींद्र रोहमारे यांच्यावर गुन्हा दाखल झाला. या फिर्यादीनुसार राष्ट्रवादीच्या महिलांना लज्जास्पद वर्तन करणे, धक्काबुक्की केल्याचा आरोप केला आहे. तसेच पुतळ्यातील काठ्या काढून मारहाण केली, असे फिर्यादित म्हटले आहे.