प्रताप भोईटे
शिरूर : शिरूर तालुक्यातील न्हावरे येथील भारतीय प्रशासन सेवेतील सेवानिवृत्त अधिकारी मुळचे शिरूर तालुक्यातील न्हावरे येथील किशोर राजे निंबाळकर (Kishor Raje Nimbalkar) यांची आज राज्यपाल भगतसिंह कोश्यारी यांच्या आदेशाने महाराष्ट्र लोकसेवा आयोगाच्या (MPSC) अध्यक्षपदी निवड करण्यात आली.
निंबाळकर यांचे प्राथमिक व माध्यमिक शिक्षण न्हावरे येथे झाले. त्यानंतर त्यांनी बी. एस्सी. ऍग्रीकल्चरचे शिक्षण राहुरी विद्यापीठातून घेतले. त्यांचे पदव्युत्तर शिक्षण पुण्यात झाले. 1987 मध्ये त्यांची अक्कलकोट येथे तहसीलदार म्हणून नियुक्ती झाली. अक्कलकोट येथे श्री स्वामी समर्थांचे अन्नछत्र पूर्ण करण्यास त्यांनी महत्त्वाची भूमिका बजावली होती. सोलापूरला दोन वर्षे प्रांताधिकारी, नंतर पंढरपूरला प्रांताधिकारी म्हणून काम केले. पंढरपूर देवस्थानात अनेक चांगले बदल घडविले. मंदिराच्या गाभाऱ्यापासून दर्शनबारी, लाडूचा प्रसादवाटप, स्वच्छता, अन्नछत्र आदी विषयांत महत्त्वपूर्ण भूमिका बजावली.
पिंपरी चिंचवड (जि. पुणे) येथे जकात अधिकारी म्हणून काम केले. माजी मंत्री विजयसिंह मोहिते- पाटील यांचे खासगी सचिव, नंतर ते उपमुख्यमंत्री झाल्यानंतर उपसचिव, सचिवपदावर काम केले. विधानसभेचे माजी अध्यक्ष व सध्याचे गृहमंत्री दिलीप वळसे- पाटील यांचे सचिव म्हणूनही त्यांनी काम केले. राज्य सीमा दलाचा सहाय्यक आयुक्त म्हणून काम करताना 34 नवीन नाकाबंदी ठाणी सुरू केली. ठाणे जिल्हा परिषदेत मुख्य कार्यकारी अधिकारी म्हणून काम करताना ठाणे जिल्हा हागणदारीमुक्त केला. चार महिन्यांत जिल्ह्यात बावीस हजार शौचालये बांधली.
"पेसा' कायद्यांतर्गत 533 पाड्यांचे रूपांतर गावात करून सोयी-सुविधा दिल्या. लोकसहभागातून डिजिटल शाळा केल्या. त्यानंतर जळगावचे जिल्हाधिकारी म्हणून ही त्यांनी आपल्या कामाची छाप पाडली. महाराष्ट्र जीवन प्राधिकरणाचे सचिव म्हणून त्यांनी लक्षवेधी काम केले.
न्हावरे या आपल्या गावाच्या जडणघडणीतही त्यांचा मोठा वाटा आहे. न्हावरे फाटा येथे जलद - अतिजलद एसटी बस थांबवाव्यात यासाठी त्यांनी पत्रव्यवहार करुन हा प्रश्न मार्गी लावला आहे. न्हावरे गावासाठी पीएमपीएमएलची बससेवा सुरू व्हावी यासाठीही त्यांचाच पुढाकार होता. त्यांच्या या निवडीमुळे शिरूर तालुक्यासह त्यांच्या गावातील ग्रामस्थांकडून अभिनंदनाचा वर्षाव होत आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.