पुणे : पुणे महापालिकेच्या प्रशासनाच्या दिशेने भाजपच्या पदाधिकाऱ्यांनी आता पुन्हा नेम धरला असून, प्रशासनाविरोधात ढीगभर तक्रारी मांडून, न्यायाची अपेक्षा सत्ताधाऱ्यांनी मुख्यमंत्री देवेंद्र फडणवीस यांच्याकडे केली आहे.
महापालिकेतील कुरबुऱ्या फारशा मनावर न घेणाऱ्या मुख्यमंत्री फडणवीसांनीही तक्रारदारांना थेट "वर्षा'वर हजर राहून आपले म्हणणे मांडण्याचे फर्मान सोडले आहे. मुख्यमंत्र्यांची सूचना मनावर घेऊन महापालिकेतील कारभारी म्हणजे, सभागृहनेते श्रीनाथ भिमाले प्रशासनाविरोधात "दारुगोळा' जमविण्याच्या तयारीला लागले आहेत.
सत्ताधाऱ्यांचा खरा रोष आहे, तो महापालिकेतील अतिरिक्त आयुक्त शितल उगले-तेली यांच्यावर. उगलेंबाबतच्या तक्रारींना "कारभारी'च खतपाणी घालत असल्याचे लपून राहिलेले नाही. याआधी उगले-तेलींविरोधात घेतलेल्या सह्यांच्या मोहिमेतही "कारभारी'च आघाडीवर होते. तेव्हाही थेट मुख्यमंत्र्यांकडेच तक्रार करीत, उगलेंना बदलण्याची मागणी करण्यात आली. पण, मुख्यमंत्र्यांकडे सत्ताधाऱ्यांची डाळ शिजली नाही. तो प्रयत्न फसल्याने भाजप नेत्यांनी आता पुन्हा उगलेंविरोधात मोहीम उघडली आहे.
मुख्यमंत्री शनिवारी पुण्यात कार्यक्रमासाठी आले असता, पक्षाच्या बहुतांशी नगरसेवकांनी आर्वजून हजेरी लावली. कार्यक्रम संपताच नगरसेवकांनी मुख्यमंत्र्यांच्या भेटीचा आग्रह धरला. मात्र, एवढ्या नगरसेवकांना भेटणे शक्य नसल्याचे त्यांना सांगण्यात आले. तेव्हा "कारभारी' अर्थात, भिमालेंनी नेतृत्त्व केले आणि आपल्या पक्षाच्या नगरसेवकांकडील तक्रारींचा पाढा फडणवीसांपुढे वाचला. शहरातील पाणीपुरवठ्यासोबतच महत्त्वाच्या प्रकल्पांना गती देण्यात प्रशासन कमी पडत असल्याचे मुख्यमंत्र्यांच्या कानावर घालण्यात आले.
या साऱ्या बाबी ऐकून घेतल्यानंतर मुख्यमंत्र्यांनीही जागेवर निकाल लावण्याऐवजी, "कारभारी' भिमालेंसह प्रमुख पदाधिकाऱ्यांना मुंबईत बोलविले. या भेटीत खलबते करून भिमाले आपला निशाणा साधण्याच्या बेतात आहेत. मात्र उगले-तेलीही आपली बाजू मांडण्याच्या तयारीत असल्याचे सांगण्यात आले. त्यामुळे मुख्यमंत्र्यांच्या उपस्थितीत होणाऱ्या बैठकीबाबत महापालिकेच्या वर्तुळात उत्सुकता आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.