Chandrakant Patil : चंद्रकांतदादा म्हणतात; माझी व्यक्तिगत भूमिका छोट्या महापालिकांच्या बाजूचीच !

PMC News : महापालिकेतून फुरसुंगी आणि उरळी देवाची ही गावे वगळल्याने पुण्यातील राजकीय वातावरण तापले आहे. या मुद्द्यावरून माजी मंत्री विजय शिवतारे व आमदार संजय जगताप हे आमने सामने ठाकले आहेत. दरम्यान, आज भाजपच्या काही पदाधिकाऱ्यांनीही राज्य सरकारच्या आदेशावरून कोर्टात जाण्याचा इशारा दिला आहे. तसेच पालकमंत्री चंद्रकांत पाटील यांनी पुणे शहरात दोन महापालिका करण्याच्या मागणीचे पत्र मुख्यमंत्र्यांना दिले आहे.

पुणे महापालिकेत (PMC) २०१७ मध्ये ११ तर २०२१ मध्ये २३ गावे समाविष्ट झाली आहे. या गावात मूलभूत सुविधा पुरविण्यास होणारा विलंब व वाढलेला मिळकतकर यामुळे नागरिकांमध्ये नाराजी आहे. याच पार्श्‍वभूमीवर फुरसुंगी, उरळी देवाची ही दोन गावे महापालिकेतून वगळली आहेत. त्यांची स्वतंत्र नगरपरिषद स्थापन करण्यात आली आहे. त्यानंतर पाटील यांनी वाघोली भागाची नगरपरिषद करावी किंवा वाघोली हडपसर ही पूर्व भागाची महापालिका स्थापन करावी, अशी मागणी करणारे पत्र मुख्यमंत्री एकनाथ शिंदे (Eknath Shinde) यांना दिले आहे.

याबाबत पाटील यांनी सांगितले की, "महापालिकेच्या हद्दीलगतची गावे महापालिकेत आणून येथील कारभार अवघड करणे योग्य नाही. ग्रामपंचायतींचा विकास झाला पाहिजे, पण प्रशासनही तेथीलच असले पाहिजे. सध्या केंद्र सरकार, राज्य सरकारकडून मोठ्या प्रमाणात ग्रामपंचयतींना निधी मिळत आहे. त्यामुळे स्थानिक स्वराज्य संस्था या लहानच असाव्यात, अशी माझी भूमिका आहे. पण सरकार म्हणून एखादा निर्णय घेतला जातो, तो मान्य असतो. त्यानुसार पुढील कामे आम्ही करतो."

४० टक्के मिळकतकर माफीचा निर्णय झालेला आहे. मात्र त्याचा प्रस्ताव मंत्रीमंडळाच्या समोर आलेला नाही. त्यावर पाटील म्हणाले, "मुख्यमंत्र्यांचा वेळ उपलब्ध नसल्याने त्यांची या प्रस्तावावर स्वाक्षरी झालेली नाही. त्यांची स्वाक्षरी झाली की तो वित्त विभागाकडे जाईल. त्यानंतर मंत्रीमंडळा पुढे येईल. पुढील दोन तीन दिवसात स्वाक्षरी होईल. मिळकतकर भरण्यास ३० एप्रिलपर्यंत महापालिकेने मुदतवाढ दिली आहे. त्यापूर्वी अंतिम निर्णय होईल."

(Edited by Sunil Dhumal)