Gram Panchayat Election Result : बड्या पक्षांना धूळ चारत भणंग ग्रामपंचायतीत अपक्ष उमेदवार विजयी

राज्यातील ग्रामपंचायतीचे निकाल हाती येत असून यात सातारा तालुक्यात प्रस्थापितांना धक्का बसला आहे. गावकऱ्यांनी बड्या पक्षांच्या उमेदवारांना नाकारुन चक्क अपक्ष उमेदवारांना निवडून दिले आहे. साताऱ्यातील जावली तालुक्यातील भणंग ग्रामपंचायतीचा धक्कादायक निकाल लागला आहे. निवडणुकीमध्ये भाजप व राष्ट्रवादी काँग्रेस या दोन्ही प्रतिस्पर्धी पॅनलच्या उमेदवारांचा पराभव झाला आहे. मतदारांनी सर्व अपक्ष निवडून दिले आहेत. त्यामुळे भणंग गावचा निकाल राज्यात लक्षवेधी ठरला आहे.

भिवंडीतील शिरोळे ग्रामपंचायतीवर महाराष्ट्र नवनिर्माण सेनेने आपला झेंडा फडकवला आहे. येथे मनसेचा सरपंच निवडून आला असून एकूण 9 सदस्यांपैकी मनसेच्या 6 सदस्यांनी विजय मिळवला आहे. नाशिक जिल्ह्यातील उंबर पाडा दिंगर ग्रामपंचायतीमध्ये स्थानिक विकास आघाडीचे चिमण पवार यांचा विजय झाला आहे.भंडारा जिल्ह्यातील खराडी ग्रामपंचायत येथे काँग्रेसने खाते उघडले आहे. काँग्रेसच्या आरती हीवसे विजयी झाल्या आहेत.

नंदूरबार जिल्ह्यात काँग्रेस 22 तर, भाजपने 20 जागांवर विजय मिळवला आहे. याशिवाय ठाकरे गटाने 8 जागांवर, शिंदे गटाने 5 जागांवर तर राष्ट्रवादी काँग्रेसने 2 जागांवर विजय मिळवला आहे.

नाना पटोलेंच्या साकोली मतदारसंघात भाजपचा झेंडा

कॉंग्रेस प्रदेशाध्यक्ष नाना पटोले यांच्या साकोली मतदारसंघात भाजपने झेंडा फडकवला आहे. साकोलीतील शिरेगाव ग्राम पंचायतमध्ये भाजपपुरस्कृत रोहित संग्रामे विजयी झाले आहेत.चंद्रपूर जिल्ह्यातील कोरपना तालुक्यातील नांदा ग्रामपंचायत भाजपने ताब्यात घेतली आहे. भाजपचे सरपंचांसह 15 सदस्य निवडून आले आहेत.

रत्नागिरी जिल्ह्यात सर्वांचे लक्ष लागून राहिलेल्या दापोली विधानसभा मतदारसंघांमध्ये दहा पैकी आठ या मुुख्यमंत्री एकनाथ शिंदे गटाच्या बाळासाहेबांची शिवसेना (balasahebanchi shivsena) यांनी विजय मिळवला आहे. विद्यमान आमदार योगेश कदम यांनी पुन्हा एकदा आपले वर्चस्व सिद्ध केले आहे.

मुख्यमंत्री एकनाथ शिंदे गटास रायगड नंतर रत्नागिरी जिल्ह्यात धक्का बसला आहे. रत्नागिरीत उद्योग मंत्री उदय सामंत यांच्या गटापुढं मविआचे पॅनेल वरचढ ठरलं आहे.रत्नागिरीत सर्वात मोठी ग्रामपंचायत शिरगावमध्ये महाविकास आघाडीचा विजय झाला आहे. या निवडणुकीत महाविकास आघाडीच्या फरीदा काझी या विजयी झाल्या आहेत. उद्योग मंत्री उदय सामंत यांना व त्यांच्या गटास माेठा धक्का मानला जात आहे. काझी यांच्या विजयानंतर मविआच्या कार्यकर्त्यांनी जल्लोष केला.

100 ग्रामपंचायतीचे निकाल हाती आले आहेत. त्यापैकी 23 ठिकाणी भाजप, 15 ठिकाणी ठाकरे गट तर 14 ठिकाणी शिंदे गटाने विजय मिळवला आहे. काँग्रेस 17 तर काँग्रेसने 9 ठिकाणी विजय मिळवला आहे. तर उर्वरीत 22 ठिकाणी इतरांनी बाजी मारली आहे. भिवंडीमध्ये मनसेला काहीसा आधार प्राप्त झाला असून, खाते खोलण्यात यश आले आहे.

ग्रामीण भागात महाविकासआघाडी बऱ्यापैकी बाजी मारताना दिसत आहे. महाविकासआघाडीने आतापर्यंत 41 जागांवर बाजी मारली आहे. तर युती 37 जागा मिळवल्या आहेत. अद्यापही निकाल हाती येणे सुरु आहे. त्यामुळे हे आकडते सातत्याने बदलत राहणार आहेत. त्यामुळे अंतिम चित्र जेव्हा स्पष्ट होईल तेव्हा आकडेवारी आणखी बदललेली दिसणार आहेत.

नंदुरबार जिल्ह्यातील दुसऱ्या टप्प्यातील दोनशे ग्रामपंचायतींसाठी नुकतेच मतदान झाले. आज प्रत्यक्ष मतमोजणीला प्रारंभ झाला आहे. सध्या तीन निकाल हाती आले आहेत. तिन्ही ग्रामपंचायतींवर भारतीय जनता पक्षाची सत्ता आलेली आहे.

मुख्यमंत्री एकनाथ शिंदे (eknath shinde) गटास रायगडमध्ये धक्का बसला आहे. शिंदे गटाचे आमदार भरत गोगावले यांच्या गावची काळीज खरवली ग्रामपंचायत महाविकास आघाडीकडे (mva) गेली आहे. या ठिकाणी काँग्रेसचे उमेदवार चैतन्य महामुणकर हे विजयी झाले आहेत.

ठाण्यात राष्ट्रवादीच्या ताब्यात दोन ग्रामपंचायती आल्या असून शिंदे गटाकडे दहा ग्रामपंचायती आल्या आहेत. नाशिकमध्ये माकपनं खातं उघडलं आहे. भिंवडीत आघाडीने एका जागेवर झेंडा फडकवला आहे.