Ajit Pawar News : 'बारामती'वरून अडचणीत आणणाऱ्या शिवतारेंवर अजितदादा पहिल्यांदाच बोलले पण एकदम थेटच; 'आम्ही पण अरेला कारे...!'

Baramati Loksabha Election 2024 : उपमुख्यमंत्री अजित पवार यांनी बुधवारी प्रसारमाध्यमांशी बोलताना, विजय शिवतारेंबाबत विचारण्यात आलेल्या प्रश्नावर एक सूचक विधान केल्याचं दिसून आलं. बारामती लोकसभा मतदारसंघातून निवडणूक लढवण्यावर विजय शिवतारे ठाम आहेत. त्यामुळे अजित पवार गटाचे नेते शिंदेंच्या शिवसेनेवर नाराज आहेत.

या पार्श्वभूमीवर माध्यम प्रतिनिधीने शिवतारेंचा फटका बारामती मतदारसंघात बसेल का? असा प्रश्न विचारला असता, उपमुख्यमंत्री अजित पवार यावर म्हणाले, 'मला अद्याप काहीही माहीत नाही, मी चॅनेलवरच बघितलं की मुख्यमंत्री एकनाथ शिंदे(Ekanth Shinde) यांनी त्यांना काहीतरी आवाहन केलेलं आहे. आता वरिष्ठांचं ऐकायचं, नाही ऐकायचं हा ज्याचा त्याचा प्रश्न आहे.'

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

याचबरोबर 'आम्हाला वातावरण खराब करायचं नाही. आम्हीपण अरेला कारे करू शकतो. परंतु मला महायुतीमधील वातावरण खराब न करता. निवडणुकीला सामोरं जायचं आहे. कारण, मी काही वक्तव्य केलं की, त्याचा फार विपर्यास केला जातो. आम्हाला कायदा सुव्यवस्था नीट ठेवून या निवडणुका पार पाडायच्या आहेत. वातावरण चांगलं ठेवण्याचा आमचा प्रयत्न आहे,' असा सूचक इशाराही अजित पवारांनी(Ajit Pawar) या वेळी दिला.

याशिवाय, 'जे आमच्यासोबत येतील त्यांना आम्ही आमच्याबरोबर घेऊन जाऊ. ४८ पैकी ८० टक्के जागांचा निर्णय झालेला आहे, २० टक्के जागांबाबतचा निर्णय अद्याप व्हायचा आहे. त्याबाबत आम्ही चर्चेला बसू. ही काही गावकीची आणि भावकीची निवडणूक नाही,' असंही अजित पवारांनी सांगितलं.

तसेच 'ही देशाच्या १४० कोटी जनतेचं भवितव्य ठरवणारी निवडणूक आहे. आपण त्या दृष्टीने या निवडणुकीकडे बघूयात, मी तरी तसंच या निवडणुकीकडे बघतो आहे. मार्ग काढत असताना जे प्रतिसाद देतील त्यांना बरोबर घेऊन जाऊ, जे प्रतिसाद देणार नाहीत. त्यांच्याबद्दल त्या संबंधित पक्षाचे नेते निर्णय घेतील,' असंही अजित पवारांनी या वेळी सांगितलं.

(Edited by - Mayur Ratnaparkhe)

R