Dattatray Bharane : मीही पवारांचा पठ्ठ्या....: दत्तात्रेय भरणेंनी हर्षवर्धन पाटलांना ललकारले

इंदापूर (जि. पुणे) : विरोधकांना गप्पा मारू द्या, आपल्याला विकास कामे करायची आहेत. चौका-चौकात बोर्ड लावून विकास होत नसतो, लोकांचे प्रश्न सुटत नसतात, त्यासाठी काम करावे लागते. केंद्रात आणि राज्यात आपले सरकार नसले, तरी इंदापूर (Indapur) तालुक्याचा आमदार मीच आहे आणि मी पण पवारांचा पठ्ठ्या असल्याने निधी कसा आणायचा, हे मला कुणी सांगायची गरज नाही, असा टोला राष्ट्रवादी काँग्रेसचे इंदापूरचे आमदार दत्तात्रेय भरणे (Dattatray Bharane) यांनी माजी सहकार मंत्री हर्षवर्धन पाटील (Harshvardhan Patil) यांना लगावला. (MLA Dattatray Bharane criticizes former minister Harshvardhan Patil)

इंदापूर शहरातील विविध विकास कामांचे लोकार्पण व भूमिपूजन कार्यक्रमात आमदार भरणे हे बोलत होते. त्यावेळी त्यांनी भाजप नेते हर्षवर्धन पाटील यांच्यावर नाव न घेता टीका केली. या वेळी राष्ट्रवादी काँग्रेसचे पुणे जिल्हाध्यक्ष प्रदीप गारटकर, माजी उपनगराध्यक्ष अरविंद वाघ, सोनाई परिवाराचे प्रमुख दशरथ माने, माजी उपनगराध्यक्ष धनंजय बाब्रस, माजी नगरसेवक श्रीधर बाब्रस, राष्ट्रवादी काँग्रेसचे कार्याध्यक्ष अतुल झगडे, सुरेश गवळी, शहराध्यक्ष बाळासाहेब ढवळे उपस्थित होते.

कोणतेही पद किंवा मिळालेली संधी, हे मिरवण्यासाठी नसून सर्वसामान्य गोरगरीब जनतेची कामे करण्यासाठी असते. त्यानुरूप लोकांनी ज्या विश्वासाने मला खुर्चीवर बसवले आहे, त्या विश्वासाला पात्र राहत येणाऱ्या दोन वर्षांत शहराचा चेहरा मोहरा बदलल्याशिवाय स्वस्थ बसणार नाही, अशी ग्वाहीही माजी राज्यमंत्री भरणे यांनी दिली.

भरणे म्हणाले की, सन २१०४ पूर्वीचे इंदापूर आणि आताचे इंदापूर यात किती फरक झाला आहे, याचा विचार इंदापूरच्या जनतेने करावा. खरं कोण आणि खोटे कोण, हे ओळखावे, असे आवाहनही त्यांनी केले.

आमदार दत्तात्रय भरणे यांनी आपल्याला मिळालेल्या मंत्रिपदाच्या माध्यमातून शहराच्या वाढीव भागात विकास कामे करण्यासाठी कोट्यवधी रुपयांचा निधी उपलब्ध करून दिला, त्यामुळे इंदापूर शहराचा समतोल विकास साधला जात आहे, असे राष्ट्रवादी काँग्रेसचे जिल्हाध्यक्ष प्रदीप गारटकर यांनी सांगितले.