PMC Election : पुण्यात मुरलीअण्णा मोहोळांच्या कार्यकर्त्यांवर संक्रांत : एकालाही तिकीट नाही, दिलेले 2 AB फॉर्मही मागे घेण्याची नामुष्की

PMC Election : पुणे महापालिकेसाठी मंगळवारी उमेदवारी अर्ज भरण्याचा शेवटचा दिवस होता. उमेदवारी कोणाला मिळणार याबाबत सकाळपासून बराच गोंधळ पाहायला मिळाला. पुण्यात भाजप शिवसेनेसोबतची युती तुटल्याने आज घडीला भाजपने सर्वाधिक जागांवर आपले उमेदवार उभे केले आहेत. पण यंदा पक्षातील अनेक दिग्गजांच्या जवळच्या कार्यकर्त्यांना तसंच कुटुंबातील व्यक्तींना उमेदवारी देण्याचं टाळलं आहे.

भाजपच्या तिकीट वाटपात केंद्रीय राज्यमंत्री मुरलीधर मोहोळ यांना देखील झटका बसला आहे. त्यांच्या एकाही जवळच्या कार्यकर्त्याला भाजपनं उमेदवारी दिलेली नाही. मंडलप्रमुख नीलेश कोंढाळकर यांना पक्षाने प्रभाग क्र. 31 मधून सोमवारी एबी फॉर्म दिला होता. पण ते मोहोळ यांचे मावस बंधू असल्याच्या तक्रारी पक्षाच्या नेत्यांकडे झाल्या. 

त्यामुळे मंगळवारी पहाटे त्यांचा एबी फॉर्म रद्द करून त्यांच्याऐवजी दिनेश माथवड यांना उमेदवारी देण्यात आली. तर वृषाली माथवड यांच्या जागी ज्योत्स्ना कुलकर्णी यांना उमेदवारी दिली. मोहोळ यांचे नातेवाईक असलेल्या श्रीधर मोहोळ, युवा मोर्चाचे शहराध्यक्ष दुष्यंत मोहोळ यांचीही संधी नाकारण्यात आली.

याशिवाय मेधा कुलकर्णी यांच्या मुलीला, माधुरी मिसाळ यांच्या मुलाला, सुनील कांबळे यांच्या मुलीला उमेदवारी देणार असल्याची चर्चा होती पण त्यांना उमेदवार दिलेली नाही. त्याचवेळी माजी आमदारांपैकी योगेश मुळीक, दिवंगत मुक्ता टिळक, गिरीश बापट यांच्या कुटुंबियांना मात्र भाजपनं उमेदवारी दिली आहे.

2 आठवड्यांपूर्वी भाजपमध्ये आलेले आमदार बापू पठारे यांचे चिरंजीव सुरेंद्र पठारे हे भाजपच्या सगळ्या स्थानिक नेत्यांना भारी पडलेत. त्यांनी आपल्या कुटुंबासाठी भाजपकडून 3 AB फॉर्म मिळवले. तर अन्य 4 फॉर्म कार्यकर्त्यांसाठी मिळवल्याची माहिती आहे. सोबतच पृथ्वीराज सुतार, अभिजीत शिवणकर या माजी आमदारांच्या मुलांनाही उमेदवारी दिली आहे.

त्यामुळं सध्या राज्यात किंवा केंद्रात मंत्रीपद दिलेल्या नेत्यांच्या तसंच विद्यमान आमदार-खासदार असलेल्या नेत्यांच्या कार्यकर्त्यांना किंवा कुटुंबियांना भाजपनं सबुरीचा सल्ला दिला आहे. तर दुसरीकडं माजी आमदार-खासदारांच्या जवळच्या लोकांना मात्र उमेदवारी दिली आहे. त्याचबरोबर उर्वरित बऱ्याच जागांवर ताज्या दमाच्या नव्या उमेदवारांना भाजपनं उमेदवारी दिली आहे.