Satara Doctor Death Case : महिला डाॅक्टरच्या आत्महत्या प्रकरणात आरोप असलेला खासदार भाजपचा? स्वत: केला मोठा खुलासा

Ranjitsinh Nimbalkar News : फलटणमधील उपजिल्हा रुग्णालयात डाॅक्टर असलेल्या महिलेने गळफास घेत आत्महत्या केली. तिच्या आत्महत्येनंतर तिच्या नातेवाईकांनी खासदाराचे दोन पीए फोन करून तिच्यावर दबाव टाकत असल्याचा आरोप केला होता. त्यामुळे तो खासदार कोण याची चर्चा सुरू झाली होती. या प्रकरणी माजी विरोधी पक्षनेते अंबादास दानवे यांनी भाजपचे माजी खासदार रणजित सिंह निंबाळकर यांच्या भावावर आरोप केले आहेत. त्यामुळे या प्रकरणात माजी खासदार रणजितसिंह निंबाळकर आरोप केले जात आहे. त्यावर त्यांनी एका मराठी वृत्तवाहिनीशी बोलताना स्पष्टीकरण दिले आहे.

रणजितसिंह निंबाळकर म्हणाले, 'ही घटना निंदनीय आहे. आत्महत्येचे गलिच्छ राजकारण केलं जात आहे. डाॅक्टर महिलेचा जीव गेला. त्या महिलेने का जीव दिला, याचं संशोधन होणं गरजेचं आहे. जसं महाराष्ट्रात काही झालं तर मुख्यमंत्री देवेंद्र फडणवीस यांच्यावर आरोप केला जातो तसं इथे काही झालं तर आमच्या नावाची बदमानी करायची अशी परंपराच घडली आहे. पण याला फलटणकर भीक घालत नाही.'

'जे विरोध असतात ते नेहमीच आरोप करत असता की दबाव आहे. पण उलट आम्हीच मागणी करतोय की याची तपासणी करावी. सीडीआर खोटं बोलत नाही, सीडीआर असेल व्हाॅट्सअप मेसेज, चॅट असेल त्यातून सत्य बाहेर येईल. त्या भगिनीचा जीव गेला, यामध्ये कोणाला राजकारण करायचं आहे हे तालुक्यातला कळून आलं आहे. मयताच्या टाळूवरचे लोणी खाण्याचा प्रकार काही जण करत आहेत.', असे देखील ते म्हणाले.

प्रशांत बनकरला अटक

महिला डाॅक्टरने आत्महत्येपूर्वी पोलिस उपनिरीक्षक गोपाळ बदने आणि प्रशांत बनकर यांच्यावर गंभीर आऱोप केले आहेत. बदने याने आपल्यावर चार वेळा अत्याचार केल्याचे महिला डाॅक्टरच्या सुसाईड नोटमध्ये म्हटले आहे. तर, प्रशांत बनकर याने आपला शारीरिक आणि मानसिक छळ केल्याचे नमूद केले आहे. या दोघांवर देखील गुन्हा दाखल झाला होता. तेव्हा पासून दोघेही फरार होते. दरम्यान, पोलिसांनी प्रशांत बनकर याला पुण्यातून अटक केली आहे.