गिर्यारोहकाचे प्राण वाचविण्यासाठी  पुण्यातील राजकीय नेत्यांची तत्परता 

पुणे : वारजे माळवाडी येथील गिर्यारोहक पद्मेश पांडुरंग पाटील (वय 33) हा 15 ऑगस्ट रोजी लेह येथे गिर्यारोहण करताना दरीत पडला. त्याला चंडिगड येथील स्थानिक रुग्णालयात दाखल केले आहे. मात्र त्याला रुग्णालयात दाखल करण्यासाठी बरीच धावपळ करावी लागली. त्यासाठी पुण्यातीलच सर्वपक्षीय नेत्यांनी प्रयत्न केले.
 
स्टोक कांग्री या लेहमधील सर्वात उंच कड्यावरून तो जवळपास 18 हजार फूट खोल दरीत कोसळला होता. त्याच्यावर लेहमधील रुग्णालयात हलविण्यात आले. मात्र पुढील उपचारासाठी चंडीगड येथे दाखल करणे गरजेचे होते. 

पद्मेश यांना लेहमधून दिल्लीत लष्कराच्या हवाई रुग्णवाहिकेने आणण्यासाठी खासदार अनिल शिरोळे, सुप्रिया सुळे, आमदार भीमराव तापकीर यांनी केंद्रीय मंत्री प्रकाश जावडेकर, संरक्षण राज्यमंत्री सुभाष भामरे यांच्याशी संपर्क साधला. मुख्यमंत्री देवेंद्र फडणवीस यांनीही यात लक्ष घातले. त्यानंतर लष्कराने पद्मेश यांना हलविण्याची व्यवस्था केली. 

लष्कराच्या हवाई रुग्णवाहिकेला विलंब होत असल्याचे लक्षात आल्यानंतर नगरसेवक सचिन दोडके यांनी स्वतः अकरा लाख रूपयांचा चेक हा डॉक्‍टर हिदायत खान ह्युमन केयर एयर ऍम्बुलन्स या खासगी सर्व्हिसला दिला. पद्मेश यांना पुण्यात आणण्यासाठी सचिन दोडके हे स्वतः चंडिगडला रवाना झाले. पाटील कुटुंबीय हे मूळचे बेळगाव येथील आहेत. पद्मेश हा दोडके यांचा लहानपासूनचा मित्र आहे. 

चंडीगड येथील सरकारी रुग्णालयात पद्मेश यांना दाखल केले असले तरी तेथे उपचाराला विलंब होत असल्याचे दोडके यांनी "सरकारनामा'शी बोलताना सांगितले. "तेथे व्हेंटिलेटर नाही. रुग्णालयात त्यांना दाखल करून पाच तास झाले तरी अतिदक्षता कक्षात त्यांना हलविले गेले नाही. वरिष्ठ सरकारी अधिकाऱ्यांचे फोन येत आहेत. प्रत्यक्षात उपचाराला सुरवात झाली नाही,'' असे ते म्हणाले. 

पालकमंत्री गिरीश बापट यांनी पद्मेशवरील उपचाराचा खर्च सरकार करेल, असे आश्‍वासन दिले आहे. पुण्यातील राजकीय नेते एखाद्या नागरिकावरील संकटात कसे धावून जातात, याचे हे उत्तम उदाहरण ठरले आहे. पद्मेश याच्या प्रकृतीत तातडीने सुधारणा व्हावी, अशीच प्रार्थना सर्व जण करीत आहेत.