विजयसिंह मोहिते-पाटील म्हणतात, `भाजपने संधी दिल्यास माढ्यातून लढणार' 

माढा : भारतीय जनता पक्षाने संधी दिली तर माढा लोकसभा मतदारसंघातून निवडणूक लढण्याचे संकेत खासदार विजयसिंह मोहिते-पाटील यांनी बुधवारी माढयात दिले. 

खासदार मोहिते-पाटील यांनी बुधवारी माढयात माजी आमदार धनाजीराव साठे , जिल्हा दूध संघाचे माजी संचालक राजेंद्र चवरे यांच्या घरी भेटी - गाठी घेतल्या.  प्रा. संदीप साठे यांचे वडील व माजी आमदार धनाजीराव साठे यांचे बंधू वसंतराव साठे यांच्या वर्षश्राद्धासाठी ते आले होते. 

खासदार मोहिते-पाटील यांना माजी आमदार धनाजीराव साठे यांच्या निवासस्थानी पत्रकारांनी माढा लोकसभा तुम्ही लढण्यास इच्छूक असण्याबाबत विचारले असता पक्षाने आदेश दिल्यास निवडणूक लढण्यास तयार आहे. भाजप प्रवेशाबाबत विचारात उमेदवारी दिल्यास भाजपमध्ये प्रवेश करणार असे उत्तर दिले.

भारतीय जनता पक्षाकडून सध्या सुभाष देशमुख, माजी खासदार रणजितसिंह मोहिते पाटील, रोहन देशमुख, फलटणचे रणजितसिंह नाईक निंबाळकर यांच्याबरोबर आता खासदार विजयसिंह मोहिते-पाटील यांच्या नावाची भर पडली आहे. आता भाजपचा उमेदवार नेमका कोण ? याबाबत राजकीय वर्तुळात चर्चा आहे.