आजचा वाढदिवस : दीपक केसरकर, गृहराज्यमंत्री

नगराध्यक्ष पदापासून आज थेट गृहराज्यमंत्री तथा पालकमंत्रीपदापर्यंत दीपक केसरकर यांनी मजल मारली आहे. केसरकर यांचा प्रवास तरूणाईला दिशा देणारा आहे. आज ते गृहराज्यमंत्री म्हणून राज्याची यशस्वी जबाबदारी सांभाळत आहेत. सिंधुदुर्ग जिल्ह्यात दहशतवादाच्या विरोधात त्यांनी लढा दिला. जिल्ह्याला विकासाचे स्वप्न दाखविले. त्यामुळे येथील जनतेने एक सच्चा माणूस म्हणून त्यांना निवडून दिले. लोकांनी टाकलेला विश्‍वास सार्थकी लावण्यासाठी मी शेवटच्या श्‍वासापर्यंत काम करणार असे केसरकर आवर्जून सांगतात. केवळ घोषणा न करता जिल्ह्यासाठी प्रत्यक्षात 28 कोटी रूपयांचा निधी जिल्ह्यासाठी आणला आहे. आगामी काळात जिल्ह्याचा कायापालट करीन असा त्यांना विश्‍वास आहे. येथील शेतकरी व बागायतदार सुखी व्हावा, महिलांच्या हाताला काम मिळावे, बेरोजगारांना रोजगार मिळावा, यासाठी त्यांनी अनेक योजना जिल्ह्यात आणल्या आहेत. शेती आधुनिक व्हावी, त्यातून उत्पन्न वाढवावे, यासाठी यांत्रिकी शेतीचा प्रयोग त्यांनी राबवला आहे. पालकमंत्री दीपक केसरकर यांचे कुटुंब सावंतवाडी शहरातील उद्योजक व श्रीमंत म्हणून ओळखले जाते. त्यांच्या वाडवडीलांनी वेगवेगळे उद्योग व शेती केली. पालकमंत्री केसरकर यांचे वडील सावंतवाडी शहरात नगरशेठ म्हणून ओळखले जायचे. त्यांनी शहराच्या विकासात भरभरून मदत केली आहे. यामुळे सहाजिकच दीपक केसरकर यांना सामाजिक व राजकीय क्षेत्राची आवड निर्माण झाली.