Maharashtra Political Live Updates : अंबरनाथमध्ये तब्बल 208 संशयित मतदारांना पोलिसांनी घेतलं ताब्यात

अंबरनाथमध्ये पोलिसांनी सुमारे २०८ बोगस मतदारांना ताब्यात घेतल्याची माहिती समोर आली आहे. या सर्वांची आधार कार्ड व पॅन कार्डद्वारे सखोल तपासणी पोलिसांनी सुरू केली आहे. भाजप व काँग्रेसकडून काल रात्री २०० बोगस मतदार असल्याचा गंभीर आरोप करण्यात आला होता. त्या पार्श्वभूमीवर पोलिसांनी तपास सुरू केला आहे.

पिंपरी चिंचवडमध्ये ठाकरेंच्या शिवसेनेच्या शहराध्यक्ष पदाचा राजीनामा दिलेले संजोग वाघेरे पाटील हे आज भाजपमध्ये जाहीर प्रवेश करणार आहेत. मुंबई येथे त्यांचा प्रवेश होणार असून पिंपरी गाव येथून ते मुंबईकडे रवाना झाले आहेत.

बारामती नगरपरिषदेच्या निवडणुकीसाठी सकाशी 7.30 वाजता सुरुवात झाली. 41 जागां पैकी 34 जागांसाठी आज मतदान होत आहे. आठ जागा या बिनविरोध निवडणूक आल्या आहेत. सकाळपासूनच मतदानासाठी चांगला प्रतिसाद मिळत असल्याचे दिसून आले.

आज पुण्यातील तब्बल 22 नेते भाजपमध्ये प्रवेश करणार आहेत. प्रवेश करणाऱ्या नेत्यांमध्ये माजी नगरसेवक राहुल कलाटे, वडगाव शेरीचे आमदार बापू पठारे यांचे पुत्र सुरेंद्र पठारे, माजी नगरसेविका रोहिणी चिकटे, संजोग वाघेरे, काँग्रेसचे माजी उपमहापौर आबा बागुल त्यांचे पुत्र हेमंत बागुल तसेच सध्या राष्ट्रवादीत असलेले विकास दांगट, सायली वांजळे यांचा समावेश आहे.

मालेगाव महापालिका निवडणूक राष्ट्रवादी काँग्रेस समीर भुजबळ यांच्या नेतृत्वात लढणार आहे. रविवारी इच्छुक उमेदवारांच्या मुलाखीत पार पडणार आहेत या मुलाखती समीर भुजबळ यांच्या उपस्थित होणार आहेत.

पुणे जिल्ह्यातील नगरपरिषद सार्वत्रिक निवडणूकीकरिता शनिवार, २० डिसेंबर २०२५ रोजी सार्वजनिक सुट्टी जाहीर करण्यात आली आहे, अशी माहिती जिल्हाधिकारी तथा जिल्हा निवडणूक अधिकारी जितेंद्र डुडी यांनी दिली आहे. जेथे निवडणूक आहे तेथे ही सुट्टी लागू होणार आहे. जिल्ह्यातील बारामती, दौंड, फुरसुंगी-उरुळी देवाची, लोणावळा आणि तळेगाव दाभाडे या नगरपरिषदेच्या मतदार संघात सुट्टी असणार आहे.

अंबरनाथ, फलटण, बारामती नगरपरिषदेसह राज्यातील विविध जिल्ह्यांतील एकूण 143 सदस्यपदांसाठी आज मतदान प्रक्रिया पार पडणार आहे.सकाळी 7.30 ते सायंकाळी 5.30 या वेळेत नागरिकांना मतदानाचा हक्क बजावता येणार आहे.