KDMC Election: निवडणूक बंदोबस्तावरील पोलिसाचा संताप! मंजूर केला केवळ 500 रुपये भत्ता; उचललं स्वाभिमानी पाऊल

KDMC Election: राज्यातील २९ महापालिका निवडणुकांचे निकाल नुकतेच जाहीर झाले. या निवडणुकांमध्ये केवळ राजकीय नेते मंडळी, उमेदवार आणि मतदार अशीच चर्चा होत असली तरी ही संपूर्ण निवडणूक प्रक्रिया पार पाडण्यामागे अनेक हात असतात. यामध्ये निवडणूक अधिकाऱ्यांपासून पोलिसांचा महत्वाचा सहभाग असतो. सकाळपासून रात्री उशीरापर्यंत निवडणूक निर्विघ्न पार पाडण्याची जबाबदारी पोलिसांवर असते, त्यासाठी ही पोलीस मंडळी अहोरात्र कर्तव्य बजावत असतात. पण या पोलिसांना भत्ता किती दिली जातो? हे जर तुम्हाला सांगितलं तर तुमचीही तळपायाची आग मस्तकात जाईल. पण एका पोलिस कर्मचाऱ्यानं आपलं कर्तव्य बजावल्यानंतर मंजूर झालेल्या भत्त्याबाबत मोठं पाऊल उचललं आहे.

कल्याण डोंबिवली महानगरपालिका निवडणुकीसाठी तैनात असलेल्या एका पोलीस कर्मचाऱ्याबाबत हा प्रकार घडला आहे. या पोलीस कर्मचाऱ्याला केडीएमसीच्या शाळा क्रमांक १९ मधील एका बुथवर ड्युटी लागली होती. दिवसभर या ठिकाणी ड्युटी केल्यानंतर या पोलीस कर्मचाऱ्याला केवळ ५०० रुपये भत्ता मंजूर करण्यात आला. हा भत्ता मिळाल्याची रक्कम स्विकारल्यानंतर देयकावर आपल्या नावासमोर सही करायची असते.

या ठिकाणी या कर्चमाऱ्यानंही सही केली पण देयक स्विकारलं नाही, हे देयक मी शासनाला परत करतो आहे, असं संदेश त्यानं सहीच्या ठिकाणी लिहिला. हे देयक सध्या सोशल मीडियावर व्हायरल झालं आहे. विशेष म्हणजे या देयकावर शाळेत शिपाई म्हणून काम करणाऱ्या कर्मचाऱ्याला १५५० रुपये भत्ता मंजूर झाला. तर जनसंपर्क अधिकारी म्हणून काम करणाऱ्याला २०००, पीओंना १७०० रुपये भत्ता दिला आहे.

दरम्यान, महानगरपालिका निवडणुकीदरम्यान अहोरात्र कर्तव्य बजावणाऱ्या पोलिस कर्मचाऱ्याला केवळ ५०० रुपये भत्ता देण्यात आल्याने संताप व्यक्त होत आहे. हा भत्ता अन्यायकारक व अपमानास्पद असल्याचे सांगत संबंधित पोलिस कर्मचाऱ्याने तो परत करून निषेध नोंदवला. त्यामुळं हा मुद्दा केवळ पैशांचा न राहता पोलीस दलाच्या सन्मान व आत्मसन्मानाचा बनला आहे. लोकशाही टिकवण्यासाठी निष्ठेने काम करणाऱ्या पोलिसांच्या कष्टांची अवहेलना करण्यात आल्याची सोशल मीडियावर चर्चा सुरु आहे.