Tukaram Mundhe News: अण्णा हजारेंनी थोपटली मुंढेंची पाठ! अन्न भेसळविरोधात काय म्हणाले?

पारनेर : राज्यात तुकाराम मुंढे यांनी सुरू केलेल्या अन्न भेसळविरोधी मोहिमेचे ज्येष्ठ समाजसेवक अण्णा हजारे यांनी कौतुक केले आहे. “तुकाराम मुंडे यांच्यासारखे समाजहितासाठी काम करणारे अधिकारी देशात मोठ्या प्रमाणात निर्माण झाले पाहिजेत. त्यांच्या कार्याचा गुणाकार व्हायला हवा,” असे मत त्यांनी व्यक्त केले. समाज आणि प्रशासनात अधिकाधिक प्रामाणिक व धाडसी अधिकारी तयार होण्याची गरज असल्याचेही त्यांनी नमूद केले.

समाजहितासाठी आयुष्यभर संघर्ष करणारे अण्णा हजारे हे केवळ शासनाच्या चुकीच्या धोरणांवर टीका करत नाहीत, तर चांगले काम करणाऱ्या अधिकाऱ्यांचे खुलेपणाने कौतुकही करतात. सध्या राज्यभर सुरू असलेल्या भेसळविरोधी कारवाईत पुढाकार घेणारे अधिकारी तुकाराम मुंडे यांच्या कार्याची त्यांनी विशेष दखल घेतली.

हजारे यांनी केवळ मुंडे यांच्या मोहिमेचे समर्थनच केले नाही, तर अशा अधिकाऱ्यांची संख्या वाढणे ही काळाची गरज असल्याचे सांगितले. समाजाच्या आरोग्याशी संबंधित प्रश्नांवर कठोर भूमिका घेणाऱ्या अधिकाऱ्यांना जनतेचा पाठिंबा मिळायला हवा, असेही त्यांनी स्पष्ट केले.

दरम्यान, अण्णा हजारे स्वतःही समाजहिताच्या नव्या उपक्रमात सक्रिय झाले आहेत. वयाच्या ९०व्या वर्षी त्यांनी ‘ना नफा – ना तोटा’ या तत्त्वावर लाकडी घाण्यातून तयार होणाऱ्या भेसळमुक्त खाद्यतेल उत्पादनाचा उपक्रम सुरू केला आहे. सूर्यफूल, करडई, तीळ आणि खोबरेल तेल थेट ग्राहकांपर्यंत शुद्ध स्वरूपात पोहोचवण्याचा त्यांचा संकल्प आहे.

रिफाइंड आणि भेसळयुक्त तेलांच्या वाढत्या वापरामुळे आरोग्यावर होणारे दुष्परिणाम लक्षात घेऊन, नागरिकांना नैसर्गिक आणि विश्वासार्ह पर्याय उपलब्ध करून देण्याचा प्रयत्न या माध्यमातून केला जात आहे. अण्णा हजारे यांचा हा उपक्रम समाजासाठी प्रेरणादायी ठरत असून, निरोगी आणि भेसळमुक्त समाज घडवण्याच्या दिशेने एक महत्त्वाचे पाऊल मानले जात आहे.

देशाला आदर्श गाव संकल्पना देणारे आणि भ्रष्टाचारविरोधी लढ्यात अग्रस्थानी राहिलेले अण्णा हजारे आता निरोगी समाजासाठीही नवा आदर्श निर्माण करत असल्याची भावना व्यक्त केली जात आहे.