पंजाबमधील वादळ शांत : मुख्यमंत्र्यांच्या भेटीत सिद्धू राजीनामा मागे घेण्याचे संकेत

नवी दिल्ली : पंजाब (Punjab) काँग्रेसचे (Congress) प्रदेशाध्यक्ष नवज्योतसिंग सिद्धू (Navjot Singh Sidhu) यांनी पदाचा तडकाफडकी राजीनामा दिला आहे. सिध्दूंपाठोपाठ एका कॅबिनेट मंत्र्यांसह चार पदाधिकाऱ्यांनीही त्यांच्या समर्थनार्थ राजीनामे दिले आहेत. हे राजीनामासत्र सुरू असल्याने मुख्यमंत्री चरणजितसिंग चन्नी (Charanjit Singh Channi) यांनी सिद्धू यांनी भेटीसाठी बोलावले आहे. या भेटीत सिद्धू राजीनामा मागे घेऊ शकतात, अशी माहिती सूत्रांनी दिली.

पंजाबमध्ये राजकीय संकट निर्माण झाले असून, यातून मार्ग काढण्यासाठी पक्ष नेतृत्वाने तातडीने पावले उचलण्यास सुरवात केली आहे. पक्षाचे प्रभारी हरीश चौधरी तातडीने पंजाबमध्ये दाखल झाले आहेत. याचबरोबर मुख्यमंत्री चरणजितसिंग चन्नी यांनी सिद्धू यांच्याशी चर्चा केली आहे. चन्नी यांनी आज तातडीची मंत्रिमंडळ बैठक घेतली. यानंतर बोलताना त्यांनी या वादातून लवकरच मार्ग निघेल, असे संकेत दिले आहेत.

मुख्यमंत्री चन्नी यांनी सिद्धू यांनी आज भेटीसाठी बोलावले आहे. सिद्धू हे मुख्यमंत्र्यांनी भेटण्यासाठी रवाना झाले आहेत. याबाबत सिद्धू यांनी ट्विट केले आहे. त्यांनी म्हटले आहे की, मुख्यमंत्र्यांनी मला चर्चेसाठी बोलावले आहे. आज दुपारी 3 वाजता आमची पंजाब भवनमध्ये भेट होत आहे. कोणत्याही चर्चेसाठी त्यांचे स्वागतच आहे.

दरम्यान, सिद्धू यांचे सल्लागार मोहम्मद मुस्तफा यांनी सिद्धू हे राजीनामा मागे घेतील याचे संकेत दिले आहेत. ते म्हणाले की, काँग्रेस नेतृत्वाच्या म्हणण्याच्या पलिकडे सिद्धू जाणार नाहीत. हे पक्ष नेतृत्वालाही माहिती आहे. ते काय अमरिंदरसिंग नाहीत. अमरिंदरसिंगांनी कधीच काँग्रेस आणि पक्ष नेतृत्वाचा विचार केला नाही. कधीकधी सिद्धू भावनेच्या भरात निर्णय घेतात.

सिद्धू यांनी काल एक व्हिडीओ ट्विट केला होता. यात त्यांनी म्हटले होते की, माझी लढाई ही मुद्द्यावर आहे आणि त्यावर खूप काळापासून ठाम आहे. पंजाबच्या विकासाच्या अजेंड्यावर कोणतीही तडजोड केली जाणार नाही. मी कधीही हाय कमांडची दिशाभूल केलेली नाही अथवा दिशाभूल होऊ दिलेली नाही. माझ्या तत्वांसाठी मी कोणताही त्याग करण्यास तयार आहे. यासाठी मी मागेपुढे पाहणार नाही. कलंकित मंत्री आणि अधिकाऱ्यांची निवड करण्यात आली त्यावेळी ही व्यवस्था ही मोडून काढली. अशा प्रकारच्या निवडीला माझा विरोधच राहील.

सिध्दू यांच्या राजीनाम्यानंतर प्रदेश सरचिटणीस योगिंदर धिंग्रा यांनी पदाचा राजीनामा दिला आहे. त्याआधी कॅबिनेट मंत्री रजिया सुलताना, खजिनदार गुलजार इंदर चहल व प्रशिक्षण विभागाचे सरचिटणीस गौतम सेठ यांनीही पदाचा राजीनामा दिला आहे. सिध्दू यांच्या समर्थनार्थ या नेत्यांनी राजीनामे दिल्यानं काँग्रेसची डोकेदुखी वाढत चालली आहे. सिध्दू यांना पाठिंबा देण्यासाठी आणखी काही नेते राजीनामे देऊ शकतात, अशी चर्चा आहे.