Election Commission News: केंद्रीय निवडणूक आयोगात शिंदे गटाची १२ वकिलांची फौज; पण सिब्बलांची महत्त्वाची मागणी

Election Commission News : शिवसेना (Shivsena) पक्ष आणि चिन्हावर निवडणूक आयोगात सुनावणी सुरु आहे. दोन्ही गटाकडून लाखो प्रतिज्ञापत्र आणि पुरावे निवडणूक आयोगात सादर करण्यात आली आहे. धनुष्यबाण आणि पक्षचिन्हावर सुनावणी असून दिल्ली पोलिसांचा कडेकोट बंदोबस्त ठेवण्यात आला आहे.

ठाकरे गटाकडून ज्येष्ठ वकिल कपिल सिब्बल यांनी युक्तिवाद सुरु केला. सिब्बल म्हणाले, केंद्रीय निवडणूक आयोगात सुनावणी प्राथमिक की अंतीम हे आधी स्पष्ट करा. सर्वोच्च न्यायालयाचा निकाल येईपर्यंत आयोगात सुनावणी नको, अशी भूमिका सिब्बल यांनी मांडली. याला शिंदे गटाचे वकिल महेश जेठमलानी यांनी विरोध भूमिका घेतली. यामध्ये मागील अर्धा तासापासून दोन्ही बाजूंनी जोरदार युक्तीवाद सुरु आहे.

दरम्यान, ठाकरे गटाकडून 22 लाख 24 हजार 950 प्रतिज्ञापत्रे तर शिंदे गटाकडून 4 लाख 51 हजार 127 इतके प्रतिज्ञापत्र दाखल करण्यात आले आहेत. दोन्ही गटाकडून लाखोंच्या संख्येत प्रतिज्ञापत्र दाखल केली आहेत. शिंदे गटाच्या वकिलांचा दावा आहे, की सर्व निकषामध्ये आम्ही पुढे आहोत. त्यातच आमच्याकडे निवडून आलेले जास्त प्रतिनिधी आमच्या बाजूला आहेत.

लाखोंच्या संख्येने शिंदे गटाकडून चार बॅगमधून आणलेले कागदपत्रे जमा करण्यात आली आहेत. यापूर्वीही कागदपत्रे निवडणूक आयोगात दाखल झाले आहे. प्रतिज्ञापत्रांसाठी दोन्ही गटाकडून निवडणूक आयोगाला मुदत मागितली गेली.

ठाकरे गटाकडे राष्ट्रीय कार्यकारणीतील प्रतिनिधींची 107 प्रमाणपत्रे, संघटनात्मक प्रतिनिधींची 2 लाख 82 हजार प्राथमिक सदस्यांची 19 लाख नोंदणी व प्रतिज्ञापत्र दाखल केली आहेत.

शिंदे गटाकडून प्राथमिक सदस्य 4 लाख 48 हजार. 13 खासदार आणि 40 आमदारांसह संघटनात्मक प्रतिनिधी 711 आहे.

शिंदे गटाकडे एकूण 4 लाख 51 हजार 127 एवढी प्रतिज्ञापत्र आहेत. शेवटच्या क्षणापर्यंत शिंदे गटाकडून कागदपत्रे आणली गेली.

कागदपत्रांचे गठ्ठे एका मोठ्या खोलीत जमा करण्यात आली आहेत.