उत्पल पर्रीकर 'आप'कडून लढणार? पणजीतून तिकिटाची खुली ऑफर

पणजी : गोव्यात (Goa) पुढील महिन्यात होणाऱ्या विधानसभा निवडणुकीमुळे (Assembly Election) राजकारण पेटले आहे. निवडणुकीच्या तोंडावर भाजपमधील (BJP) मतभेद चव्हाट्यावर आले आहेत. गोव्याचे माजी मुख्यमंत्री मनोहर पर्रीकर (Manohar Parrikar) यांचे पुत्र उत्पल पर्रीकर (Utpal Parrikar) यांनी पक्षाला थेट इशारा देत उमेदवारी मागितली आहे. त्यांना भाजपने अद्याप तिकिट दिले नसल्याने आता आम आदमी पक्षाने (AAP) त्यांच्यासाठी खुली ऑफर दिली आहे.

आपने गोव्यातील सामाजिक कार्यकर्ते व वकील अमित पालेकर (Amit Palekar) यांना मुख्यमंत्रिपदाचा उमेदवार घोषित केले आहे. पालेकर यांनी उत्पल पर्रीकर यांना ही ऑफर दिली आहे. त्यांच्या ऑफरमुळे खळबळ उडाली आहे. पालेकर म्हणाले की, मनोहर पर्रीकर हे गोव्यातील अतिशय मोठे नेते होते. त्यांचे पुत्र उत्पल पर्रीकर यांना भाजपकडून तिकिट मिळत नाही. त्यांना आम्ही तिकिट देऊ शकतो. ते आमच्याकडून लढू शकतात. (AAP offers ticket to Utpal Parrikar)

पर्रीकर हे गोव्याचे मुख्यमंत्री होते तसेच, संरक्षण मंत्रीही होते. त्यांच्या मृत्यूने गोव्यात भाजपला मोठा धक्का बसला आहे. पर्रीकर हे तब्बल 25 वर्षे पणजी मतदारसंघाचे प्रतिनिधित्व करीत होते. आता मतदारसंघावर त्यांचे पुत्र उत्पल यांनी दावा सांगितला आहे. पणजीत मागील दोन महिन्यांपासून ते प्रचार करीत आहेत. त्यांनी मागील आठवड्यात पक्ष नेतृत्वाला थेट धमकीवजा इशारा दिला आहे. आता मागे वळून पाहणार नाही, असा इशारा त्यांनी दिला आहे. यामुळे गोवा भाजपमध्ये सर्व काही आलबेल नसल्याची चर्चा सुरू झाली आहे.

पणजीच्या जागेवर सध्या भाजपचे आमदार बाबूश मोन्सेरात आहेत. मोन्सेरात यांनी 2017 मध्ये विधानसभा निवडणूक तेथून लढवली होती परंतु, त्यांचा पराभव झाला होता. नंतर 2019 मध्ये त्यांनी काँग्रेसच्या 10 नेत्यांसह भाजपमध्ये प्रवेश केला होता. नंतर पर्रीकर यांच्या निधनानंतर पोटनिवडणुकीत त्यांनी पणजीवर विजय मिळवला होता. ते आता जागेवर पुन्हा दावा सांगत आहेत. याला उत्पल पर्रीकर यांनी आक्षेप घेतला आहे. त्यामुळे उत्पल यांनी मोर्चेबांधणी करीत पक्ष नेतृत्वावर दबाव टाकण्यास सुरवात केली आहे. यासाठी त्यांनी नुकतीच पक्षाचे अध्यक्ष जे.पी.नड्डा यांचीही भेट घेतली.