जॅकलिन फर्नांडिस अडचणीत! परदेशात जाण्यासाठी घेतली उच्च न्यायालयात धाव

मुंबई : अभिनेत्री जॅकलिन फर्नांडिस (Jacqueline Fernandez) आता चांगलीच अडचणीत आली आहे. तब्बल दोनशे कोटी रुपयांच्या खंडणी प्रकरणातील सूत्रधारासोबतचे तिचे संबंध उघड झाले आहेत यामुळे जॅकलिन ही सक्त वसुली संचालनालयाच्या (ED) रडारवर आली आहे. तिच्या 7.27 कोटी रुपयांच्या मालमत्तांवरही ईडीने टाच आणली आहे. यामुळे तिने आता उच्च न्यायालयात (High Court) धाव घेतली आहे.

तब्बल दोनशे कोटींच्या खंडणी प्रकरणातील तो मुख्य सूत्रधार सुकेश चंद्रशेखर (Sukesh Chandrasekhar) हा आहे. त्याच्याशी जॅकलिनचे संबंध उघड झाल्यानंतर ईडीने तिची चौकशी केली होती. यानंतर ईडीने जॅकलिनच्या 7.27 कोटी रुपयांच्या संपत्तीवर टाच आणली होती. आता तिने दिल्ली उच्च न्यायालयात धाव घेतली आहे. अबूधाबीत होणाऱ्या आयफा सोहळ्यासाठी तिला जायचे आहे. त्यामुळे 15 दिवसांसाठी परदेशात जाण्याची परवानगी तिने न्यायालयाकडे मागितली आहे. तसेच, तिने फ्रान्स आणि नेपाळमध्येही जाण्यासाठी परवानगी मागितली आहे. तिच्या विरोधात गेल्या वर्षी डिसेंबर महिन्यात लुकआऊट नोटीस बजावण्यात आल्याने तिला परदेशात जाण्यास मनाई आहे.

सुकेश आणि जॅकलिनचा एक फोटो सोशल मीडियावर व्हायरल झाला होता. हा फोटो गेल्या वर्षीच्या एप्रिल-जून महिन्यातील होता. त्यावेळी सुकेश हा जामिनावर बाहेर होता. सुकेश हा जॅकलिनला चेन्नईमध्ये चार वेळा भेटला होता. या भेटींसाठी त्याने प्रायव्हेट जेटचीही व्यवस्था केली होती. व्हायरल झालेल्या या फोटोमध्ये सुकेश चंद्रशेखर हा मिरर सेल्फी घेताना दिसत होता. या सेल्फीत तो जॅकलिनच्या गालावर चुंबन घेताना दिसत होता. त्यावेळी त्याच्या हातात असलेला आयफोन १२ प्रो मोबाईल होता. याच मोबाईलद्वारे सुकेश चंद्रशेखरने इस्रायली सिमकार्ड वापरून खंडणी मागितली होती. सुकेश तुरुंगात असतानाही तोच मोबाईल वापरत होता.

जॅकलिन फर्नांडिस या प्रकरणात सक्त वसुली संचालनालयासमोर (ईडी) गेल्या 20 ऑक्टोबरला हजर झाली होती. ईडीच्या पथकाकडून तिची चौकशी करण्यात आली होती. या प्रकरणात सुकेश चंद्रशेखर मुख्य आरोपी आहे. सलग चार वेळा चौकशीला हजर होणे टाळल्यानंतर अखेर ईडीच्या दिल्ली कार्यालयात जॅकलिन हजर झाली होती. कर चुकवेगिरी प्रतिबंधक कायद्यातंर्गत जॅकलिनचा जबाब त्यावेळी नोंदवण्यात आल्याचे आला होता. जॅकलिनचे आर्थिक व्यवहार आणि सुकेश चंद्रशेखरसोबत तिची ओळख यामुळे ती ईडीच्या रडारवर आहे.