Hindenburg Report : ‘हिंडनबर्ग’च्या बॉम्बनंतर अदानींनी ‘सेबी’ प्रमुखांशी कनेक्शनचा केला खुलासा...

New Delhi : अमेरिकेतील हिंडनबर्ग रिसर्चने भारतात पुन्हा एकदा खळबळ उडवून दिली आहे. सिक्युरिटीज अँड एक्सचेंज बोर्ड ऑफ इंडिया म्हणजेच सेबीच्या प्रमुख माधवी पुरी बुच आणि पती धवल बुच यांची अदानी उद्योग समुहातील काही कंपन्यांमध्ये गुंतवणूक केली होती, असा आरोप हिंडनबर्गने केला आहे.

हिंडनबर्गच्या आरोपांनंतर भारतातील राजकारण पुन्हा एक तापू लागलं आहे. शनिवारी रात्री हिंडनबर्ग हा बॉम्ब टाकल्यानंतर दररोज उच्चांक गाठणाऱ्या शेअर बाजाराबाबतही आता साशंकता निर्माण झाली असून विरोधकांनी एनडीए सरकारला घेरण्यास सुरूवात केली आहे.

अदानी उद्योगसमुहाचा खुलासा

हिंडनबर्गच्या रिपोर्टवर अदानी उद्योगसमुहाने खुलासा केला आहे. माधवी पुरी यांच्याशी कोणतेही व्यावसायिक कनेक्शन नसल्याचे कंपनीने स्पष्ट केले आहे. विदेश कंपन्यांमधील गुंतवणूक पूर्णपणे पारदर्शक आहे. रिपोर्टमधील आरोप दुर्भाग्यपूर्ण आहेत. आपल्याला केवळ बदनाम करण्यासाठी हे होत आहे. याआधीच्या आरोपांची चौकशी झाली आहे. ते निराधार असल्याचे सिध्द झाले आहे. सुप्रीम कोर्टाने जानेवारी 2024 मध्ये फेटाळून लावले आहेत, असे अदानी समुहाने म्हटले आहे.

माधवी बुच यांनीही आरोप फेटाळले

माधवी बुच यांनी हिंडनबर्गचे आरोप फेटाळून लावले आहेत. आपले आर्थिक व्यवहार पारदर्शक आहेत. हिंडनबर्गवर याआधी सेबीने कारवाई केली असून त्यांना कारणे दाखवा नोटीस पाठवण्यात आली आहे. त्याला उत्तर देताना त्यांनी चारित्र्यहनन करण्याचा पर्याय निवडला आहे, बुच दाम्पत्याने म्हटले आहे.

हिंडनबर्गचा अदानींवर दुसरा बॉम्ब

हिंडनबर्गने दीड वर्षांपुर्वीही अदानी समुहावर गंभीर आरोप केले होते. अदानींच्या शेअर बाजारातील लिस्टेड कंपन्यांच्या शेअरमध्ये हेरफेरीपासून ते कर्जाबाबत अनेक दावे करण्यात आले होते. हे आरोपही अदानींनी फेटाळून लावले होते. पण हा रिपोर्ट बाहेर येताच अदानी कंपन्यांना मोठा फटका बसला होता. बहुतेक सर्वच कंपन्यांचे शेअर तब्बल 85 टक्क्यांनी खाली आल्याने अदानींच्या संपत्तीत 60 अब्ज ड़ॉलरची घट झाली होती.