Bollywood celebrities Death Threats : सैफवरील हल्ल्यानंतर आता मनोरंजन विश्वातील तीन कलाकारांना जीवे मारण्याची धमकी; पाकिस्तानशी कनेक्शन?

16 जानेवारी 2025 ला सैफ अली खानवर हल्ला झाला ज्यामध्ये तो जखमी झाला. तसेच आता तो बरा आहे आणि त्याला रुग्णालयातून डिस्चार्ज देण्यात आला आहे. पण याच दरम्यान आणखी एक धक्कादायक बातमी समोर येत आहे. प्रसिद्ध विनोदी कलाकार कपिल शर्मा आणि बॉलिवूड अभिनेता राजपाल यादव, नृत्यदिग्दर्शक रेमो डिसूझा आणि विनोदी अभिनेत्री सुगंधा मिश्रा यांना जीवे मारण्याच्या धमक्या मिळाल्या आहेत. या प्रकरणात पोलीस सतर्क झाले असून त्यांनी तपास सुरू केला आहे. ही बातमी आल्यानंतर मनोरंजन विश्वात पुन्हा एकदा खळबळ उडाली आहे.

आता पोलिसांनी या प्रकरणाचा सखोल तपास सुरू केला आहे. विष्णू नावाच्या व्यक्तीने राजपाल यादवच्या ईमेल अकाउंटवर धमकीचा मेल पाठवला आहे, ज्यामध्ये शर्मा, त्याचे कुटुंब, त्याचे सहकारी आणि राजपाल यादव यांना मारले जाईल अशी धमकी देण्यात आली आहे.

१४ डिसेंबर २०२४ रोजी पाठवलेल्या या ईमेलने चिंता निर्माण केली आहे. हा ईमेल don99284@gmail.com या ईमेल पत्त्यावरून राजपाल यादवच्या टीमच्या teamrajpalyadav@gmail.com या ईमेल अकाउंटवर पाठवण्यात आला होता.

यावर तात्काळ कारवाई करत राजपाल यादव यांच्या पत्नी राधा राजपाल यादव यांनी मुंबईतील अंबोली पोलिस ठाण्यात पोलिस तक्रार दाखल केली आहे. अंबोली पोलिसांनी भारतीय दंड संहितेच्या कलम ३५१(३) अंतर्गत गुन्हा दाखल केला आहे, जो हानी पोहोचवण्याच्या धमकीशी संबंधित आहे. पोलिसांनी या प्रकरणाचा तपास सुरू केला आहे. पोलिसांनी अद्याप जबाबदार व्यक्तीची ओळख पटलेली नाही.

आयएएनएसच्या वृत्तानुसार, विनोदी अभिनेत्री सुगंधा मिश्रा यांच्या तक्रारीवरून पोलिसांनी तक्रार दाखल करून या प्रकरणाचा तपास सुरू केला आहे. धमकीचा ईमेल मिळाल्यानंतर रेमो डिसूझाने पोलिस ठाण्यात तक्रारही दाखल केली आहे. पोलिसांच्या म्हणण्यानुसार, धमकीचा ईमेल पाकिस्तानमधून पाठवण्यात आला होता.

दरम्यान, याआधी बाबा सिद्दीकीवर झालेल्या प्राणघातक हल्ल्यानंतर, बॉलिवूड सुपरस्टार सलमान खानला दिलेल्या धमक्या आणि बॉलिवूड अभिनेता सैफ अली खानवर झालेल्या चाकू हल्ल्यानंतर शहरातील कायदा आणि सुव्यवस्थेची परिस्थिती बिघडत असल्याने मुंबई पोलिसांनी दक्षता वाढवली आहे.