Aryan Khan: आर्यन खान पुन्हा समीर वानखेडेंच्या रडारवर! आता थेट दिल्ली हायकोर्टात होणार फैसला

Aryan Khan Vs Sameer Wankhede: बॉलिवूड स्टार शाहरुख खानचा मुलगा आर्यन खान सध्या त्याच्या पहिल्या वहिल्या दिग्दर्शनात तयार झालेल्या 'बॅड्स ऑफ बॉलिवूड' या वेब सीरिजमुळं चर्चेत आहे. याच वेब सीरिजमुळं आता अडचणीत देखील आला आहे त्याला माजी एनसीबी (नार्कोटिक्स कन्ट्रोल ब्युरो) अधिकारी समीर वानखेडे यांनी थेट कोर्टात खेचलं आहे. आर्यनच्या वेबसीरिजमध्ये समीर वानखेडे यांचं पात्र दाखवण्यात आल्यानं हे प्रकरण थेट दिल्ली हायकोर्टात पोहोचलं आहे.

नेटफ्लिक्स आणि रेड चिलीज एंटरटेन्मेंटनं या वेब सीरिजची निर्मिती केली आहे. या वेबसीरिजमध्ये वादग्रस्त ठरलेल्या बॉलिवूडच्या अनेक कलाकारांच्या कहान्या दाखवण्यात आल्या आहेत. त्यामध्ये आर्यन खान ड्रग्ज प्रकरणात कारवाई करणारे आणि नंतर राजकीय चर्चेमुळं वादग्रस्त ठरलेले आयआरएस अधिकारी समीर वानखेडे यांचं विडंबनात्मक पात्र आर्यन खानच्या वेबसीरिजमध्ये दाखवण्यात आलं आहे. या वेब सीरिजमध्ये आपल्याशी संबंधित अपमानजनक पात्र दाखवण्यात आलं असल्याचा दावा वानखेडे यांनी आपल्या अब्रुनुकसानीच्या याचिकेत केला आहे. यामध्ये तब्बल दोन कोटी रुपयांचा मानहानीचा दावा त्यांनी दाखल केला आहे.

या वेबसीरिजमध्ये समीर वानखेडेंसारखं पात्र पाहिल्यानंतर त्यांची पत्नी अभिनेत्री क्रांती रेडकर हीनं एका व्हिडिओद्वारे इशारा दिला आहे. यामध्ये तिनं समीर वानखेडे यांचा लहानपणीचा आणि मोठं झाल्यानंतर पोलीस अधिकारी झाल्याचा फोटो आहे, त्यात 'तुम जलन बरकरार रखना हम जलवे बरकरार रखेंगे' हे गाणं तिनं लावलं आहे.

मूळ प्रकरण काय?

२०२१ मध्ये मुंबईहून गोव्याला निघालेल्या कार्डिलिया क्रूझवर हायप्रोफाईल रेव्ह पार्टीचं आयोजन करण्यात आलं होतं. या पार्टीची खबर कळताच नार्कोटिक्स कन्ट्रोल ब्युरोचे झोनल डिरेक्टर असलेल्या समीर वानखेडे यांनी आपल्या टीमसह छापेमारी केली होती. या छाप्यात बड्या उद्योगपतींची मुलं असलेले अरबाज मर्चंट, मुनमुन धमीचा आणि बॉलिवूड अभिनेता शाहरुख खानचा मुलगा आर्यन खान यांना ताब्यात घेतलं होतं. या तिघांकडं ड्रग्ज आढळून आल्याचा दावा एनसीबीनं केला होता. आर्यन खानजवळ १३ ग्रॅम कोकेन, ५ ग्रॅम एमडी, २१ ग्रॅम चरस आणि एमडीएमएच्या २२ गोळ्या आढळून आल्या असून या ड्रग्जची एकूण किंमत १,३३,००० रुपये असल्याचं त्यावेळी एनसीबीचं म्हणणं होतं.

या प्रकरणात अटक झाल्यानंतर आर्यन खान तब्बल २५ दिवस तुरुंगात होता. त्यानंतर सबळ पुराव्यांअभावी त्याची सुटका झाली होती. पण त्यानंतर समीर वानखेडे यांच्यावर अनेक आरोप झाले, याच प्रकरणात त्यांनी लाच घेतल्याचा आरोप झाला. तसंच त्यानंतर राष्ट्रवादी काँग्रेसचे नेते नवाब मलिक यांनी वानखेडे यांचं जात प्रमाणपत्र खोट असल्याचं सांगत आरोपांची राळ उडवून दिली होती. तसंच त्यांच्या नावावर वयाची १८ वर्षे पूर्ण होण्यापूर्वीच एक बारचा परवाना असल्याचेही आरोप त्यांनी केले होते. त्यामुळं हे प्रकरण भलतीकडंच ओढलं गेलं होतं. यामध्ये भाजपच्या अनेक नेत्यांचीही नावं समोर आली होती. त्यामुळं हे प्रकरण त्यावेळी बराच काळ चर्चेत राहिलं होतं.