Teacher : नवा निर्णय! आता भटकी कुत्री शिक्षकांनी मोजायची? सरकारचा अजब फतवा, नव्या प्लॅनने संतापाची लाट

belagavi News : मुलांना दूध-अंडी देण्याची नोंद ठेवा, मतदार यादी पुनरावलोकनासाठी बीएलओची जबाबदारी घ्या, यासह इतर सरकारी कामांची जबाबदारी शिक्षकांवर आहे. आता लवकरच कुत्र्यांच्या वाढत्या संख्येवर नियंत्रण ठेवण्यासाठी सरकारतर्फे हाती घेतल्या जाणाऱ्या योजनेसाठी सरकारी आणि अनुदानित शाळेतील प्रत्येकी एका शिक्षकाची नोडल अधिकारी म्हणून नेमणूक केली जाणार आहे.

राज्यात भटक्या कुत्र्यांच्या नियंत्रणासाठी कठोर उपाययोजना करण्याच्या तयारीत असलेल्या सरकारने आता शाळा परिसरातील भटक्या कुत्र्यांवर नियंत्रण ठेवण्यासाठी शिक्षकांनाच नोडल अधिकारी म्हणून नियुक्त करण्याचा निर्णय घेतला आहे. त्यानुसार प्रत्येक शाळेतील एका शिक्षकाची नोडल अधिकारी म्हणून नियुक्ती करण्याची प्रक्रिया प्राथमिक आणि माध्यमिक शाळांमधील विद्यार्थ्यांच्या परीक्षा पूर्ण झाल्यानंतर सुरू करण्यात येणार असल्याची माहिती देण्यात आली आहे.

भटक्या कुत्र्यांबाबत सर्वोच्च न्यायालयाने तीव्र नाराजी व्यक्त करून कठोर पावले उचलण्याचे आदेश दिले होते. या पार्श्वभूमीवर राज्य सरकारने राज्यातील सर्व सरकारी, अनुदानित आणि विनाअनुदानित शाळांच्या परिसरात भटक्या कुत्र्यांवर नियंत्रण ठेवण्यासाठी अधिकाऱ्यांची बैठक घेऊन प्रत्येक शाळेत एका शिक्षकाला नोडल अधिकारी म्हणून नियुक्त करण्याचा निर्णय घेण्यात आला आहे.

मात्र शिक्षकांवर विविध सरकारी कामांचा बोजा असल्यामुळे नवीन जबाबदारी शिक्षकांवर देऊ नये अशी मागणी वाढत असतानाच कुत्र्यांच्या संख्येवर नियंत्रण ठेवण्यासाठी हाती घेतल्या जाणाऱ्या योजनांची जबाबदारी शिक्षकांना देण्याच्या निर्णयाबद्दल तीव्र नाराजी व्यक्त होऊ लागली असून राज्यभरात आधीच शिक्षकांची कमतरता आहे. केंद्र सरकार लवकरच जनगणना सुरू करणार असून त्यातही शिक्षकांना सहभागी व्हावे लागणार आहे.

तसेच एसआयआर सुरू करण्याचे आदेश देखील देण्यात आले आहेत. त्यामुळे कर्मचारी कमतरतेच्या परिस्थितीत सरकारच्या अनेक कार्यक्रमांसाठी शिक्षकांची नियुक्ती करावी लागत असल्याने शालेय शिक्षण खात्यावर मोठा ताण आहे. अशा परिस्थितीत भटक्या कुत्र्यांसाठीही शिक्षकांना नोडल अधिकारी बनवण्याचा निर्णय हास्यास्पद असल्याचे मत शिक्षकांमधून व्यक्त होत आहे.

बीएलओ पदाची जबाबदारीही कठीण!

शिक्षक आधीच अनेक जबाबदाऱ्यांच्या ओझ्याखाली दबले आहेत. कर्मचारी कमतरतेमुळे अनेक शाळांमध्ये एकाच शिक्षकावर सर्व कामांची जबाबदारी आहे, तर काही शाळांमध्ये बदलीवर शिक्षक काम करत आहेत. दररोज अनेक अहवाल ऑनलाइन अपलोड करावे लागत असल्याने विद्यार्थ्यांना शिकवण्यापेक्षा अहवाल देण्यातच अधिक वेळ जात आहे.

याशिवाय माध्यान्ह भोजन, अंडी आणि केळी वितरणाची जबाबदारीही शिक्षकांवर आहे. बीएलओ पदाची जबाबदारी पार पाडणेही कठीण होते. अशा परिस्थितीत भटक्या कुत्र्यांच्या नियंत्रणासाठीही शिक्षकांचा वापर करणे कितपत योग्य आहे, असा सवाल शिक्षकांकडून उपस्थित केला जात आहे.

FAQs :

1. शिक्षकांना कोणती नवी जबाबदारी देण्याचा निर्णय सरकारने घेतला आहे?
शाळा परिसरातील भटक्या कुत्र्यांवर नियंत्रण ठेवण्यासाठी शिक्षकांना नोडल अधिकारी म्हणून नियुक्त करण्याचा निर्णय घेतला आहे.

2. ही योजना कोणत्या शाळांमध्ये लागू होणार आहे?
सरकारी आणि अनुदानित शाळांमध्ये प्रत्येकी एका शिक्षकाची नियुक्ती केली जाणार आहे.

3. शिक्षकांवर आधी कोणत्या जबाबदाऱ्या आहेत?
दूध आणि अंडी वितरणाची नोंद ठेवणे, मतदार यादी पुनरावलोकनासाठी बीएलओ म्हणून काम करणे यासारख्या जबाबदाऱ्या आधीच शिक्षकांकडे आहेत.

4. या योजनेचा उद्देश काय आहे?
शाळा परिसरातील भटक्या कुत्र्यांची संख्या कमी करणे आणि विद्यार्थ्यांची सुरक्षा सुनिश्चित करणे हा मुख्य उद्देश आहे.

5. या निर्णयावर प्रतिक्रिया काय आहे?
शिक्षकांवर आधीच कामाचा ताण असल्याने या निर्णयावर चर्चा आणि नाराजी व्यक्त केली जात आहे.