Nitish Kumar News : नितीश कुमार यांची मानसिक आणि शारीरिक स्थिती अस्थिर! एका व्हिडीओने नेत्यांना वाटू लागली चिंता...

Bihar Politics : बिहारचे मुख्यमंत्री नितीश कुमार यांच्यावर चोहोबाजूने टीका होऊ लागली आहे. राष्ट्रगीत सुरू असताना शेजारी शांततेत उभ्या असलेल्या प्रधान सचिवांना उकसावणे, समोर हात जोडून नमस्कार करणे, इतरत्र पाहणे... हा नितीश कुमारांचा व्हिडीओ सोशल मीडियात व्हायरल झाला आहे. त्यानंतर आता त्यांची मानसिक आणि शारीरिक स्थिती स्थिर नसल्याचा मोठा दावा विरोधकांनी केला आहे.

नितीश कुमार यांचा बिहारमधील एक व्हिडीओ समोर आला आहे. एका कार्यक्रमात राष्ट्रगीत सुरू असताना व्यासपीठावर नितीश कुमार यांच्यासह वरिष्ठ अधिकारी व इतर काही जण दिसत आहे. नितीश कुमार यांच्या शेजारी राज्याचे प्रधान सचिव दीपक कुमार होते. राष्ट्रगीत सुरू असतानाच नितीश कुमार त्यांच्याशी बोलण्याचा प्रयत्न करत होते. पण दीपक कुमार यांच्याकडून त्यांना रोखण्याचा प्रयत्न होत होते.

नितीश कुमार यांची ही कृती पाहून दीपक कुमार त्यांना सरळ उभे राहण्याचा इशारा करताना व्हिडीओमध्ये दिसत आहेत. पण त्याकडे दुर्लक्ष करत नितीश कुमार समोर उभ्या असलेल्या एका व्यक्तीला हात जोडून नमस्कार करतात. त्यानंतर इतरत्र पाहू लागतात. मुख्यमंत्र्यांच्या या कृतीचा व्हिडीओ सोशल मीडियात व्हायरल झाल्यानंतर विधिमंडळातही त्याचे पडसाद उमटले.

माजी मुख्यमंत्री राबडी देवी यांनी नितीश कुमार यांनी माफी मागावी, अशी मागणी केली. नितीश कुमार यांचे डोके ठिकाणावर नसल्याची टीकाही त्यांनी केली. विधान परिषदेत जोरदार हंगामा झाल्यानंतर कामकाज स्थगित करावे लागले. बिहारचे माजी उपमुख्यमंत्री तेजस्वी यादव यांनीही नितीश कुमार यांची मानसिक आणि शारिरीक स्थिती स्थिर नसल्याची टीका केली आहे.

यादव यांनी म्हटले आहे की, कमीत कमी राष्ट्रगीताचा अपमान तरी नका करू. युवक, विद्यार्थी महिला आणि ज्येष्ठांचा अपमान तुम्ही रोज करत आहात. कधी महात्मा गांधींच्या पुण्यतिथीदिनी टाळ्या वाजवता, तर कधी राष्ट्रगीताचा अपमान करता. तुम्ही एका राज्याचे मुख्यमंत्री असल्याचे आठवण करून देतो. तुम्ही काही सेंकदही मानसिक आणि शारीरिक दृष्ट्या स्थिर नाही. अशा स्थितीत या पदावर राहणे राज्यासाठी अतिचिंताजक बाब आहे. बिहारला असे वारंवार अपमानित करू नका.