Narendra Modi : बिहारचा कौल 'एनडीए'ला! प्रचंड विजयानंतर मोदींची पहिली प्रतिक्रिया; म्हणाले, 'हा विजय म्हणजे...'

बिहार विधानसभा निवडणूक 2025 च्या निकालांमध्ये एनडीएने घेतलेल्या प्रचंड आघाडी नंतर पंतप्रधान नरेंद्र मोदी यांनी आपली पहिली प्रतिक्रिया दिली आहे. महाआघाडीचा सुपडासाफ करत एनडीएने 243 पैकी 200 हून अधिक जागांवर आघाडी घेत विजय मिळवला आहे. या निकालानंतर देशभरातून राजकीय प्रतिक्रिया उमटत असताना पंतप्रधान मोदींनी बिहारच्या जनतेचे, तसेच सर्व मित्रपक्षांचे आभार मानले आहेत.

पंतप्रधान मोदींनी सोशल मीडिया प्लॅटफॉर्म ‘एक्स’वर पोस्ट करत म्हटले की, "हा विजय म्हणजे हा विजय म्हणजे सुशासन, विकास, जनकल्याण आणि सामाजिक न्यायाचा अभूतपूर्व विजय आहे", त्यांनी पुढे लिहिले की, बिहारच्या जनतेने दाखवलेल्या विश्वासाबद्दल ते अत्यंत कृतज्ञ आहेत आणि हा प्रचंड पाठिंबा हेच दर्शवतो की राज्यातील लोकांना एनडीएची काम करण्याची पद्धत आणि विकासाचा मार्ग पटला आहे.

मोदी बिहारच्या जनतेचे आभार मानताना पुढे म्हटले की, "बिहारमधील माझ्या कुटुंबियांनो 2025 च्या निवडणुकीत एनडीएला मिळालेला ऐतिहासिक विजय म्हणजे आमच्यावरचा आशीर्वाद आहे. आम्ही हा विश्वास कायम ठेवण्यासाठी आणि जनतेची निष्ठेने सेवा करण्यासाठी अधिक जोमाने काम करू."

.

पंतप्रधानांनी एनडीएच्या सर्व कार्यकर्त्यांचे विशेष कौतुक केले. ते म्हणाले की, कार्यकर्त्यांनी जनतेपर्यंत विकासाचा अजेंडा योग्य पद्धतीने पोहोचवला आणि विरोधकांनी केलेल्या आरोपांना ठोसपणे उत्तर दिले. "एनडीएचा प्रत्येक कार्यकर्ता हा या विजयाचा खरा शिल्पकार आहे," असेही त्यांनी नमूद केले.

आगामी काळातील योजनांचा उल्लेख करताना मोदी म्हणाले की, बिहारचा सर्वांगीण विकास, पायाभूत सुविधांचा विस्तार, तसेच राज्याच्या समृद्ध संस्कृतीला नवी ओळख देण्यासाठी सरकार वेगाने काम करणार आहे. विशेषत: युवा शक्ती आणि नारी शक्ती यांच्यासाठी मोठ्या संधी निर्माण करण्यावर केंद्राचा भर असेल, असे त्यांनी स्पष्ट केले.

बिहारमधील या निकालाने राजकीय समीकरणे पूर्णपणे बदलली आहेत. एनडीएच्या या मोठ्या विजयाने राज्यात स्थिरता आणि वेगवान विकासाचा संदेश दिला असून, पंतप्रधानांनी दिलेल्या प्रतिक्रियेत या विजयाचा आत्मविश्वास आणि भावी कामाचा संकल्प स्पष्टपणे दिसून येतो