Bihar Election Result : विजय शिवतारेंचे जावई बिहारमध्ये आमदार होणार? शिवदीप लांडेंच्या मतदारसंघातील कल हाती

Bihar Election Result : बिहार विधानसभा निवडणुकीचा निकाल आज जाहीर होणार आहे. सकाळपासून 243 विधानसभा मतदारसंघातील मतमोजणीला प्रारंभ झाला असून हळूहळू निकालाचे सुरुवातीचे कल समोर येऊ लागले आहेत.

यामध्ये सध्या जेडीयू आणि भाजप आघाडीवर असल्याचं दिसत आहे. तर काँग्रेस आणि आरजेडी काही जागांवर पिछाडीवर आहे. या सर्व मतमोजणीत महाराष्ट्रातील लोकांना एका निकालाची खुप उत्सुकता लागली आहे.

ती म्हणजे बिहारमध्ये आपल्या धडाकेबाज कामगिरीमुळे सिंघम अशी ओळख निर्माण केलेले आयपीएस अधिकारी शिवदीप लांडे यांचं या निवडणुकीत काय होणार याची. सध्याच्या प्राथमिक कलांनुसार अररिया विधानसभा मतदारसंघातील मतमोजणीत शिवदीप लांडे हे पिछाडीवर असल्याचं आहेत.

मात्र, लांडे यांच्यामुळे या मतदारसंघात जेडीयू आणि काँग्रेसमधील लढाई चुरशीची बनल्याचं दिसत आहे. या मतदारसंघात सध्या काँग्रेसचे विद्यमान आमदार अबिदुर रहमान आणि जेडीयूच्या शगुफ्ता अझीम यांच्यात जोरदार चुरस सुरू आहे. दोन्ही उमेदवार मतांवर आपली पकड कायम ठेवत आहेत.

तर जनसुराज्यचे उमेदवारफरहत आरा बेगम यांच्यामुळे देखील या मतदारसंघातील निवडणुक रंगतदार बनली आहे. पोस्टल मतमोजणीत काँग्रेसचे अबिदुर रहमान आघाडीवर होते. मात्र, त्यानंतर ईव्हीएम मतमोजणीत शगुफ्ता अझीम यांनी रहमान यांना गाठल्याचं पाहायला मिळालं. सध्याच्या कलानुसार शिवदीप लांडे हे पिछाडीवर आहेत. मात्र ते विजयी होणार का, याकडे संपूर्ण महाराष्ट्राचे लक्ष लागलं आहे.

कोण आहेत शिवदीप लांडे?

शिवदीप लांडे यांचा जन्म अकोल्याचा असून शेगाव येथील अभियांत्रिकी कॉलेजमधून पदवी प्राप्त केल्यानंतर भारतीय पोलिस सेवेमध्ये 2006 च्या बॅचचे बिहार केडरचे अधिकारी होते. त्यांची पोलिस अधीक्षक म्हणून पहिलीच नियुक्ती मुंगेरला झाली होती. शिवदीप लांडे बिहार पोलीस दलात 18 वर्षे काम केल्यानंतर ते राजकीय आखाड्यात उतरले. सध्या ते अररिया विधानसभा मतदारसंघातून अपक्ष उमेदवार म्हणून निवडणूक लढवत आहेत. लांडे हे राज्याचे माजी मंत्री आणि शिंदे गटाचे नेते विजय शिवतारे यांचे जावई आहेत.