Bihar Election Result Live : मोठी बातमी : बिहारमध्ये महाआघाडीचा सुपडासाफ; NDA ची जोरदार मुसंडी...

NDA Heads Toward Historic Win Across the State : बिहार विधानसभा निवडणुकीचे चित्र आता जवळपास स्पष्ट होऊ लागले आहे. मतमोजणीच्या सुरूवातीच्या काही फेऱ्यांचे कल हाती आले असून त्यानुसार राज्यात ‘एनडीए’ने बहुमताचा आकडा पार केला आहे. भारतीय निवडणूक आयोगाच्या अधिकृत आकडेवारी नुसार, मुख्यमंत्री नितीश कुमार यांचा संयुक्त जनता दल पक्ष सर्वात मोठा पक्ष ठरताना दिसत आहे. त्यांच्या लाटेमध्ये विरोधी महाआघाडीचा सुपडासाफ होताना दिसत आहे.

जेडीयूने मागील निवडणुकीच्या तुलनेत अविश्वनीय कामगिरी करून दाखविल्याचे सध्याच्या कलांमध्ये दिसत आहे. एनडीएला महाआघाडीच्या तुलनेत दुप्पट जागा मिळताना दिसत आहेत. त्यामध्ये जेडीयूने जोरदार आघाडी घेतली आहे. निवडणूक आयोगाच्या आकडेवारीनुसार, सकाळी १०.१५ वाजेपर्यंत २१९ विधानसभा मतदारसंघाचे कल हाती आले आहेत. त्यामध्ये जेडीयूला ७० जागांवर आघाडी मिळाली आहे.

भाजपलाही ७० जागांवर आघाडी मिळाली असून तेजस्वी यादव यांच्या राष्ट्रीय जनता दलाला ४० जागांवर आघाडी आहे. चिराग पासवान यांची लोक जनशक्ती पक्ष (राम विलास) चौथ्या क्रमांकावर असून या पक्षाला १५ जागांवर आघाडी मिळाली आहे. काँग्रेस ९ जागांसह पाचव्या क्रमांकावर आहे. निवडणूक आयोगाच्या आकडेवारीनुसार, एनडीएला आतापर्यंत १५० हून अधिक जागांवर आघाडी मिळताना दिसत आहे.

सुरूवातीच्या कलांमध्ये भाजप आणि जेडीयूचा स्ट्राईक रेट दमदार राहिला असून यामध्ये महाआघाडीचा सुपडा साफ होताना दिसत आहे. राज्यात पुन्हा एनडीएची सत्ता येणार असल्याचे सध्याचे चित्र आहे. जेडीयूच्या वाढलेल्या जागांमुळे नितीश कुमार पुन्हा मुख्यमंत्री होणार, हेही जवळपास स्पष्ट झाले आहे. नितीश कुमार यांनी आपला करिष्मा दाखवून देत भाजपलाही सूचक इशारा देण्याचा प्रयत्न केला आहे.  

बिहारमध्ये एनडीएला लँडस्लाईड विजय मिळताना दिसत आहे. सुरूवातीचे हे कल असेच कायम राहिल्यास महाराष्ट्रातील निकालाची पुनरावृत्ती होताना दिसू शकते. महाराष्ट्रातही महायुतीला अविश्वसनीय यश मिळाले होते. तेच कल बिहारमध्येही दिसून येत आहेत. मात्र, बिहारमध्ये जेडीयूने आपली ताकद दाखवून दिली आहे.