Bihar Political News : विधानसभा उपाध्यक्षांचा तडकाफडकी राजीनामा; बिहारमध्ये पुन्हा उलथापालथ

Bihar News : बिहारचे मुख्यमंत्री नितीश कुमार यांनी काही दिवसांपूर्वीच विधिमंडळात बहुमत सिद्ध केले आहे, पण त्यानंतरही बिहारच्या राजकारणात उलथापालथ सुरूच आहे. विधानसभेचे उपाध्यक्ष महेश्वर हजारी यांनी आपल्या पदाचा तडकाफडकी राजीनामा दिला. पक्षप्रमुखांना विश्वासात घेऊन आपण राजीनामा दिल्याचा दावा हजारी यांनी केला असला तरी बिहारच्या राजकारणात पुन्हा तर्कवितर्क लढवले जाऊ लागले आहेत. (Bihar Political News)

विधिमंडळ सचिवालयाने हजारी यांनी राजीनामा दिल्याची माहिती दिली. त्यांनी आज दुपारी आपल्या पदाचा राजीनामा दिला. ते कल्याणपूर विधानसभा मतदारसंघाचे आमदार आहेत. ते मार्च 2021 पासून विधानसभा उपाध्यक्ष होते. नितीश कुमार (Nitish Kumar) यांच्या पक्षातील ते ज्येष्ठ नेते आहेत. त्यामुळे त्यांच्या राजीनाम्याने चर्चांना उधाण आले आहे.

राजीनाम्याबाबत बोलताना हजारी यांनी सांगितले की, मी पक्षप्रमुखांशी चर्चा करून हा निर्णय घेतला आहे. पक्षाचा एक समर्पित कार्यकर्ता असल्याने माझ्याबाबतीत पक्ष जो निर्णय घेईल, त्यानुसार काम करेन. पक्षाने दिलेली जबाबदारी निष्ठेने पार पाडेन, असे हजारी यांनी म्हटले आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दरम्यान, हजारी यांनी नितीश कुमार यांच्या मंत्रिमंडळात यापूर्वी काम केले आहे. त्यामुळे त्यांना पुन्हा मंत्रिमंडळात स्थान मिळण्याची शक्यता व्यक्त केली जात आहे. बिहारमधील एनडीए (NDA) सरकारच्या मंत्रिमंडळाचा विस्तार लवकरच होण्याची शक्यता आहे. त्यामुळे हजारी यांचाही समावेश होऊ शकतो, अशी चर्चा आहे. जातीय समीकरण साधण्यासाठी हजारी यांना मंत्रिपद मिळेल, असा दावा केला जात आहे.    

R