Video Tejashwi Yadav : पिय्यकड पुत्र! तेजस्वी यादव यांचा मद्यधुंद स्थितीतील व्हिडिओ? नेमकं काय घडलं...

Bihar : राष्ट्रीय जनता दलाचे नेते तेजस्वी यादव यांचा एक व्हिडिओ सोशल मीडियात व्हायरल झाला आहे. यामध्ये ते मद्यधुंद स्थितीत मीडियाशी संवाद साधताना दिसत आहेत. काही युझर्सकडून हा व्हिडिओ ‘एक्स’वर पोस्ट करण्यात आला असून त्यामध्ये ‘लालू का होनहार पियक्कड पुत्र’ असे लिहिले आहे.

सोशल मीडियात व्हायरल करण्यात आलेला व्हिडिओ तीन दिवसांपुर्वीचा असून एडिट केलेला आहे. यादव यांच्या मूळ व्हिडिओमध्ये छेडछाड करण्यात आल्याचे समोर आले आहे. मूळ व्हिडिओमधील बोलण्याचा वेग कमी करण्यात आला असून यादव यांनी मद्यप्राशन केल्याचे भासवण्यात आले आहे.

सोशल मीडियात अनेकांनी छेडछाड केलेला व्हिडिओ शेअर केला आहे. मूळ व्हिडिओ केवळ 30 सेकंदांचा आहे. हा व्हिडिओ अनेक वृत्तवाहिन्यांच्या सोशल मिडिया प्लॅटफॉर्मवर आहे. तेजस्वी यादव यांचा व्हायरल करण्यात आलेला व्हिडिओ 43 सेकंदांचा आहे. त्यामुळे मूळ व्हिडिओचा वेग कमी करण्यात आल्याचे स्पष्ट झाले आहे.

तेजस्वी यादव हे मिडीयाशी बोलताना मद्यधुंद स्थितीत नसल्याचे समोर आले आहे. कुणीतरी खोडसाळपणा करून मूळ व्हिडिओ एडिट केल्याचे दिसते. मुळ व एटिड केलेले व्हिडिओ पाहिल्यानंतर त्यातील फरक स्पष्टपणे जाणवतो.

दरम्यान, तेजस्वी यादव यांनी मिडीयाशी बोलताना केंद्र सरकारच्या खातेवाटपावरून पंतप्रधान नरेंद्र मोदींवर टीका केली आहे. ज्या बिहारमुळे तुम्ही पंतप्रधान बनला, त्या बिहारच्या लोकांना कुठूनतरी आणून एक खेळणं दिलं आहे. कुणाला कोणते खाते द्यायचे ही जबाबदारी पंतप्रधानांची असते, अशी टीका तेजस्वी यांनी केली आहे.