Bihar politics : बिहारची सत्ता नितीश कुमार नव्हे, ‘डीके बॉस’च्या हाती! खळबळ उडवणारी कोण आहे ही व्यक्ती?

Nitish Kumar’s Role Questioned Amidst Power Shift Allegations : बिहार विधानसभेची निवडणूक पुढील काही महिन्यांवर येऊन ठेपली आहे. पुन्हा सत्ता काबीज करण्यासाठी एनडीएकडून जय्यत तयारी सुरू करण्यात आली असून विरोधकांकडूनही आरोपांच्या फैऱी झाडल्या जात आहेत. पण सध्या बिहारच्या राजकारणात एक नाव खूप गाजत आहे. ते म्हणजे ‘डीके बॉस’. या नावामुळे बिहारच्या राजकारणात सध्या खळबळ उडाली आहे.

राष्ट्रीय जनता दलाते नेते व माजी उपमुख्यमंत्री तेजस्वी यादव यांनी ‘डीके बॉस’ या व्यक्तीचा शोध लावला आहे. त्यांनी नितीश कुमार सरकारवर आरोप करताना मोठा दावा केला आहे. बिहारमध्ये खरी सत्ता मुख्यमंत्री नितीश कुमार यांच्या हातात नव्हे तर एका ‘डीके बॉस’च्या हाती आहे, असा दावा करताना यादव यांनी या व्यक्तीला सुपर सीएमही म्हटले आहे.

तेजस्वी यादव यांच्या या दाव्यानंतर बिहारच्या राजकारणात चर्चांना उधाण आले आहे. ही डीके बॉस व्यक्ती कोण, यावरून तर्कवितर्क लढविले जाऊ लागले आहेत. बिहारमधील एका वरिष्ठ आयएएस अधिकाऱ्याबाबत यादव बोलत असल्याचीही चर्चा आहे. याबाबत त्यांनी संकेत दिले आहेत.

राज्यात भ्रष्टाचार आणि सत्तेचा दुरूपयोग होत असल्याचा आरोप करत यादव म्हणाले, बिहारमध्ये ना डीजीपीचे काही चालत नाही, मुख्य सचिवांचे. नितीश कुमारांचेही काही चालत नाही. संपूर्ण सत्ता डीके टॅक्स वसूल करणाऱ्या डीके बॉसच्या हातात आहे. आपल्याकडे डीके टॅक्स आणि भ्रष्टाचाराचे पुरावे आहेत. लवकरच ते सार्वजनिक करणार असल्याचा इशाराही यादव यांनी दिला आहे.

डीके बॉस म्हणजे कोण हे यादव यांनी स्पष्ट केलेले नाही. पण बिहारमधील एक आयएएस अधिकारी असल्याचे सांगितले जात आहे. नितीश कुमार यांनी त्यांच्या पत्नीला मोठे पद दिल्याचा दावाही यादव यांनी केला आहे. नितीश कुमार यांच्या कार्यकाळात अनेक अधिकारी त्यांचे विश्वासू मानले जात होते.

प्रामुख्याने निवृत्त अधिकारी दीपक कुमार, प्रत्यय अमृत, चंचल कुमार, संजीव हंस, कुमार रवी, चैतन्य प्रसाद आदी अधिकाऱ्यांची नावे घेता येतील. हे अधिकारी नितीश कुमार यांचे अत्यंत विश्वासू मानले जातात. त्यापैकी डीके बॉस मध्ये दीपक कुमार तर नाहीत ना, अशी चर्चा सुरू झाली आहे. दीपक कुमार हे मुख्यमंत्र्यांचे प्रधान सचिव आहेत.