CDS रावत यांच्या निवासस्थानी कडक सुरक्षा, कार्यक्रम रद्द करुन राष्ट्रपती दिल्लीला

कुन्नूर (तमिळनाडू) : चीफ ऑफ डिफेन्स स्टाफ (CDS) जनरल बिपीन रावत (Bipin Rawat) यांच्या हेलिकॉप्टरला आज दुपारी १२ वाजून ४० मिनीटांनी तमिळनाडूतील कुन्नूरजवळ अपघात झाला. या अपघातात रावत (Bipin Rawat) त्यांच्या पत्नी मधूलिका यांच्यासह व अन्य काही जण जखमी झाले असून त्यांना उपचारासाठी रुग्णालयात दाखल करण्यात आले आहे. वायूसेनेने ट्विट करुन याबाबतची माहिती दिली आहे. तर या अपघातात ८ जणांचा मृत्यू झाला असल्याची माहिती तमिळनाडूचे वनमंत्री रामचंद्रन यांनी दिली आहे.

या अपघातातनंतर दिल्लीत घडामोडींना वेग आला आहे. रावत यांच्या घराबाहेरील सुरक्षा वाढवण्यात आली आहे. तसेच काही वेळापूर्वी देशाचे संरक्षणमंत्री राजनाथसिंह यांनीही रावत यांच्या घरी भेट दिली. यावेळी त्यांनी रावत यांच्या कुटुंबियांना दुर्घटनेची माहिती दिली असून या आणीबाणीच्या प्रसंगी संपुर्ण देश रावत यांच्या तब्येतीसाठी प्रार्थना करत असल्याचा विश्वास दिला असल्याची माहिती विश्वसनीय सुत्रांनी दिली आहे. यानंतर राजनाथसिंग संसदेत पोहचले असून संध्याकाळी ५ वाजता ते या घटनेबाबत लोकसभेत निवेदन सादर करणार आहेत.

तर राष्ट्रपती रामनाथ कोविंदही मुंबईतील आपला नियोजित कार्यक्रम रद्द करुन दिल्लीला रवाना झाले आहेत. राष्ट्रपती रामनाथ कोविंद यांच्या हस्ते आज संध्याकाळी ४ वाजता राजभवनात नवीन बांधण्यात आलेल्या दरबार हॉलचे उदघाटन करण्यात येणार होते. मात्र हा कार्यक्रम स्थगित करुन ते दिल्लीला गेले आहेत.

रावत यांच्यासोबत ब्रिगेडियर एल. एस. लिड्डर, लेफ्टनंट कर्नल हरजिंदर सिंग, नायक गुरूसेवक सिंग, नायक जितेंद्र सिंग, लान्सनायक विवेक कुमार, लान्सनायक बी. साई. तेजा, हवालदार सतपाल हेही असल्याची माहिती समोर आली आहे. हेलिकॉप्टर कोसळल्यानंतर लगेच पेट घेतला. तातडीने बचावकार्य सुरू करण्यात आलं आहे. त्यावेळी स्थानिकांनी जखमींना रुग्णालयात नेल्याचे समजते. दरम्यान, संरक्षणमंत्री राजनाथसिंह घटनास्थळावर जाणार असल्याचे समजते.