देशाला स्वातंत्र्य ९९ वर्षांसाठी भाडेतत्वावर मिळाले; भाजप प्रवक्त्याचा दावा

नवी दिल्ली : देशाला स्वातंत्र्य ९९ वर्षांसाठी भाडेतत्त्वावर मिळाले, असा अजब दावा करणाऱ्या एका तरुणीचा व्हिडीओ सोशल मीडियावर चांगलाच व्हायरल होत आहे. या व्हिडीओमुळे या तरुणीला नेटकऱ्यांनी चांगलेच ट्रोल केले आहे. ही तरुणी भाजप (BJP) युवा मोर्चाची प्रवक्ता आहे. त्यामुळे तिने केलेले हे विधान चर्चेचा विषय ठरत आहे.

एका मुलाखतीत भाजप युवा मोर्चाची प्रवक्ता रुची पाठक (Ruchi Pathak) सहभागी झाली होती. काँग्रेसबद्दल बोलत असताना तिने हे विधान केले. काँग्रेसला पूर्ण स्वातंत्र्यही मिळवता आले नाही. ९९ वर्षांसाठी हे स्वातंत्र्य त्यांनी घेतलेले असल्याचे रुची म्हणाली. ती म्हणाली, भारत संपूर्णपणे स्वतंत्र झालेला नाही. हे स्वातंत्र्य ९९ वर्षांच्या भाडेतत्त्वार मिळालेले. ब्रिटीश क्राऊनने भारताला ९९ वर्षांच्या भाडेकराराने स्वातंत्र्य दिले. आणि याला काँग्रेस जबाबदार आहे. इतिहासाची पाने तुम्ही चाळून पाहा. स्वातंत्र्य आंदोलन चालू होते आणि पंडित नेहरु व महात्मा गांधी नेतृत्व करत होते. त्या वेळी ब्रिटीशांना भारताला स्वातंत्र्य द्यायचे नव्हते. त्यावेळी निवडणुका नसल्याने नेहरु आणि गांधीजी यांनी ब्रिटीश क्राऊनची शपथ घेतली होती. त्यामुळे आज मिळालेले स्वातंत्र्य हे ९९ वर्षांच्या भाडेकरारावर आहे. मी याचे पुरावेही तुम्हाला देऊ शकते, असा दावाही रुची पाठक हीने केला आहे.

तिने केलेल्या या दाव्याविषयी कार्यक्रमाच्या निवेदकानेही तिला विचारले की, जर ही एवढी मोठी गोष्ट आहे तर भाजपचे नेते आणि इतर कोणत्याही पक्षाचे नेते याबद्दल कसलाच उल्लेख करत नाहीत? त्यावर आपण पुरावे सादर करु शकतो, असेच ती म्हणत होती. तिचे हे विधान आता सोशल मीडियावर चांगलेच व्हायरल होत आहे. अनेक मीम्सचा विषयही ठरत आहे. अनेकांनी तिला व्हॉटसप विद्यापीठाची विद्यार्थिनीही असे म्हटले आहे.