R C Poudyal : दहा दिवसांपासून बेपत्ता, आता कालव्यात आढळला माजी मंत्र्याचा मृतदेह

बिहारमधील विकासशील इन्सान पक्षाचे प्रमुख आणि माजी मंत्री मुकेश सहानी यांचे वडील जीतन सहानी ( 70 ) यांची सोमवारी हत्या झाल्याची थरकाप उडविणारी घटना समोर आली होती. यातच आता सिक्किमचे माजी मंत्री आरसी पौड्याल यांचा मृतदेह पश्चिम बंगालमध्ये आढळून आला आहे.

आरसी पौड्याल यांचा मृतदेह कालव्यात आढळला आहे. पौड्याल यांच्या तपासासाठी 'एसआयटी' स्थापन करण्यात आली होती. घड्याळ आणि कपड्यांमुळे पौड्याल यांची ओळख पटवण्यात आली.

80 वर्षीय पौड्याल यांचा मृतदेह मंगळवारी पश्चिम बंगालमधील ( West Bengal ) सिलिगुडीतील फुलाबारी तीस्ता येथे कालव्यात तरंगताना आढळून आला. तीस्ता नदीमधून पौड्याल यांचा मृतदेह कालव्यात वाहत आल्याचा अंदाज आहे. घड्याळ आणि कपड्यांवरून त्यांची ओळख पटविण्यात आली आहे.

पौड्याल 7 जुलैला सिक्किमधील छोटा सिंगतान येथून बेपत्ता झाले होते. त्यांच्या तपासासाठी सिक्किम सरकारनं 'एसआयटी' स्थापन केली होती. पौड्याल यांच्या मृत्यूप्रकरणी पुढील तपास सुरू आहे, अशी माहिती पोलिसांनी दिली आहे.

पौड्याल सिक्किम विधानसभेचे उपाध्यक्ष राहिले आहेत. तसेच, ते वनमंत्री देखील होते. पौड्याल यांनी 'राइझिंग सन पक्षा'ची स्थापना केली होती. त्यांना सिक्किमच्या सामाजिक आणि सांस्कृतिक क्षेत्राचा गाढा अभ्यास होता.