Gaya : ४० वर्षे केली शहराची स्वच्छता, आता त्याच शहराच्या उपमहापौरपदी सफाई कामगाराची निवड!

Bihar Gaya : बिहारच्या गया जिल्ह्यात नुकतंच महापालिकेची निवडणूक पार पडली.आता पालिकेचा निकाल हाती आले आहेत. येथे रविंद्र कुमार यांचा महापौर पदासाठी विजय झाला आहे, तर उपमहापौरपदासाठी चिंता देवी यांनी निवडणूक जिंकली. विशेष बाब म्हणजे, उपमहापौर चिंता देवी या मागील ४० वर्षांपासून गया महापालिकेत सफाई कर्मचारी म्हणून काम करत होत्या. यावेळी त्यांनी उपमहापौर पदासाठी निवडणुक लढवली होती. यात त्यांचा तब्बल १६००० मतांनी विजय झाला आहे. (Bihar News)

चिंता देवी या पालिकेत सफाई कामगार म्हणून मागील ४० वर्षापासून कार्यरत होत्या. नियमितपणे कचरा उचलणे, झाडू मारणे सफाई करणे, हा त्यांचा दैनंदिन कामाचा भाग होता. मात्र यंदा गया महापालिकेच्या उपमहापौर पदासाठी जागा आरक्षित ठेवण्यात आली. यामुळे चिंता देवी निवडणुकीत उभ्य़ा राहिल्या, लोकांच्या समर्थनामुळे ते त्यांना निवडणुकीत प्रचंड मते मिळाली. यामुळे एक सफाई कामगार महिला ते थेट महापालिकेच्या उपमहापौरपदी विराजमान झाल्या.

शहराला स्वच्छ ठेवण्याचं काम त्यांनी मागील ४० वर्षांपासून इमाने इतबारे केलं. पालिकेची एक सफाई कामगार ते पालिकेच्या सत्तेपर्य़ंतचा त्यांचा प्रवास अनेकांसाठी प्रेरणादायी आहे. आता ते शहराची उपमहापौरपदाची खुर्चीवर त्या विराजमान होतील. चिंता देवी यांच्या पतीचं काही काळाआधी निधन झालं आहे.