Congress MLAs not reachable : भाजपने भुकंपाची तयारी करताच काँग्रेसचा बडा नेता मैदानात : 'प्लॅन' उधळण्यासाठी 6 आमदारांची 'संकटमोचकाकडे' रवानगी

राज्यसभा निवडणुकीच्या पार्श्वभूमीवर राजकीय वातावरण चांगलेच तापले आहे. भाजपकडून क्रॉस व्होटिंग आणि आमदारांची फोडाफोड होण्याची शक्यता लक्षात घेऊन काँग्रेसने आपले आमदार सुरक्षित ठेवण्याचा निर्णय घेतला आहे. देशातील 10 राज्यांतील 37 राज्यसभेच्या जागांसाठी 16 मार्च रोजी मतदान होणार आहे.

या पार्श्वभूमीवर ओडिशातील राजकारणात अचानक मोठ्या हालचाली दिसू लागल्या आहेत. भाजपकडून क्रॉस व्होटिंग घडवून आणण्याचा प्रयत्न होऊ शकतो, अशी भीती व्यक्त करत काँग्रेसने सहा आमदारांना थेट कर्नाटकातील बेंगळुरू येथे हलवले आहे. या घडामोडीमुळे राज्यातील राजकारणात मोठी खळबळ उडाली आहे.

काँग्रेस विधानमंडळ पक्षाचे नेते रामचंद्र कदम यांनी या निर्णयाची पुष्टी केली. त्यांनी सांगितले की पक्षाचे काही आमदार सध्या बेंगळुरूच्या बाहेरील भागातील एका रिसॉर्टमध्ये ठेवण्यात आले आहेत. आमदारांवर कोणत्याही प्रकारचा दबाव येऊ नये आणि संभाव्य ‘हॉर्स ट्रेडिंग’पासून त्यांना दूर ठेवता यावे, यासाठी हा उपाय करण्यात आल्याचे त्यांनी स्पष्ट केले. काँग्रेसचे सर्व आमदार पक्षासोबत ठामपणे उभे आहेत, असा दावा त्यांनी केला.

बेंगळुरूला पाठवण्यात आलेल्या आमदारांमध्ये पक्षाचे मुख्य शिस्तपालक सी. एस. राजेन एक्का, प्रफुल्ल प्रधान, मंगू खिला, अशोक दास, पवित्र साउंता, राजन एक्का आणि कद्रका अप्पाला स्वामी यांचा समावेश आहे. कर्नाटकचे उपमुख्यमंत्री डी. के. शिवकुमार यांनी या आमदारांना तातडीने बेंगळुरूला बोलावल्याचे सांगितले जात आहे. संभाव्य राजकीय घडामोडींना आळा घालण्यासाठी या आमदारांना शहराबाहेरील एका रिसॉर्टमध्ये ठेवण्यात आले आहे. त्यामुळे काँग्रेसने आमदारांना सुरक्षित ठेवण्याचा प्लॅन ‘संकटमोचक’ डी. के. शिवकुमार यांनी राबवल्याचे स्पष्ट झाले आहे.

ओडिशामधील राज्यसभेच्या 4 जागांसाठी 16 मार्च रोजी मतदान होणार आहे आणि या निवडणुकीत एकूण 5 उमेदवार रिंगणात आहेत. 147 सदस्यीय विधानसभेत बीजेडीकडे 48 आमदार आहेत, तर भाजपकडे 79 आमदार असून 3 अपक्ष आमदारांचा पाठिंबा आहे.