Rekha Gupta oath Ceremony : काँग्रेसच्या नेत्यानं रेखा गुप्ता यांच्यासोबत घेतली होती शपथ! फोटो होतोय व्हायरल...

New Delhi News : दिल्लीच्या मुख्यमंत्री म्हणून रेखा गुप्ता यांनी आज शपथ घेतली. त्यांच्या शपथविधीचा आणखी एक फोटो सध्या सोशल मीडियात व्हायरल होत आहे. विशेष म्हणजे या फोटोमध्ये त्यांच्यासोबत काँग्रेसच्या एक महिला नेत्याही शपथ घेताना दिसत आहेत. या नेत्यानेच राजकारण बाजूला ठेवत हा फोटो सोशल मीडियात पोस्ट केला आहे.

काँग्रेस नेत्या अलका लांबा यांनी राजकीय शत्रुत्व बाजूला सारत जुन्या आठवणींना उजाळा देणारी पोस्ट सोशल मीडियात केली आहे. त्यांच्या या कृतीचे कौतुकही होत आहे. त्यांनी गुप्ता यांच्यासोबतचा 1995 मधील एक फोटो शेअर केला आहे. या फोटोमध्ये त्या दोघी एकत्र शपथ घेताना दिसत आहेत. दिल्ली विद्यापीठाच्या विद्यार्थी संघटनेच्या निवडणुकीत दोघीही त्यावेळी विजयी झाल्या होत्या.

अलका लांबा या त्यावेळी नॅशनल स्टुडंट्स युनियन ऑफ इंडियामध्ये तर रेखा गुप्ता या एबीव्हीपीमध्ये होत्या. लांबा यांनी त्यावेळी विद्यार्थी संघटनेच्या अध्यक्षपदाची तर गुप्ता यांनी सरचिटणीस पदाची शपथ घेतली होती. हीच आठवण लांबा यांनी गुप्ता यांचे नाव मुख्यमंत्रिपदासाठी जाहीर झाल्यानंतर सांगितली आहे.

लांबा यांनी म्हटले आहे की, 1995 चा हा फोटो. मी आणि रेखा गुप्ता यांनी एकत्र शपथ घेतली होती. मी एनएसयूआयमध्ये असताना विद्यार्थी संघटनेच्या अध्यक्षपदाच्या निवडणुकीत विजय मिळवला होता. तर रेखा यांनी महासचिव झाल्या होत्या. रेखा गुप्ता यांना शुभेच्छा. दिल्लीला चौथ्या महिला मुख्यमंत्री झाल्याबद्दल त्यांचे अभिनंदन. आम्हाला आशा आहे की, यमूना स्वच्छ होईल आणि मुली सुरक्षित होतील, असे लांबा यांनी म्हटले आहे.

दरम्यान, रेखा गुप्ता यांच्याआधी सुषमा स्वराज, शीला दीक्षित आणि आतिशी या दिल्लीच्या महिला मुख्यमंत्री होत्या. त्यामध्ये सर्वाधिक काळ म्हणजे तब्बल 15 वर्षे दीक्षित यांनी दिल्लीत सत्ता गाजवली. आता गुप्ता यांना पाच वर्षांचा कालावधी मिळाला आहे. त्या भाजपच्या चौथ्य मुख्यमंत्री आहेत. यापूर्वी पाच वर्षांतच भाजपचे तीन मुख्यमंत्री होते.