Congress On AAP And Trinamool Congress : 'केजरीवाल - ममतांचा पक्ष भाजपच्या ‘बी’ टीम, अंजली निंबाळकरांचा हल्लाबोल

Panaji News : 2027 मध्ये गोव्यात विधानसभेच्या निवडणुका होणार आहेत. यासाठी भाजपसह सर्वच पक्ष मैदानात उतरले आहेत. आता आम आदमी आणि तृणमूल काँग्रेसने देखील शड्डू ठोकला असून ते देखील निवडणुकीची तयारी करत आहेत. यावरून गोवा काँग्रेसने माजी मुख्यमंत्री अरविंद केजरीवाल आणि मुख्यमंत्री ममता बनर्जी यांच्यावर जोरदार टीका केली आहे. तर आम आदमी आणि तृणमूल काँग्रेस भाजपची बी टीमप्रमाणे काम करत असल्याची दावा केला आहे. यामुळे कधीकाळी इंडिया आघाडीचे पक्ष असणारे पक्ष आता एकमेंकासमोर आले आहेत.

महिला काँग्रेसच्या प्रभारी सचिव डॉ. अंजली निंबाळकर यांनी विधानसभेच्या निवडणुकीवरून आम आदमी आणि तृणमूल काँग्रेस तोफ डागली आहे. निंबाळकर यांनी, केवळ गोव्यात येऊन भाजपसाठी जे काम करतात, ते आम आदमी आणि तृणमूल काँग्रेस पक्षाने दाखवून दिले आहे. त्यामुळे 2027 च्या निवडणुकीत या पक्षांनी उतरूच नये, असा सल्ला दिला आहे. त्या महिला काँग्रेसच्या कार्यक्रमानंतर पत्रकारांशी बोलत होत्या.

यावेळी त्या पुढे म्हणाल्या, 2022 च्या विधानसभा निवडणुकीत या पक्षांनी काँग्रेसचे मोठे नुकसान केले. भाजपच्या ‘बी’ टीमसारखे दोन्ही पक्षाचे काम होते आणि आजही सुरू आहे. त्यामुळे आताही हे दोन्ही पक्ष तेच करणार आहेत. आगामी विधानसभा निवडणुकीत उतरून हे दोन्ही पक्ष भाजपलाच एकप्रकारे मदत करणार आहेत. 2022 च्या निवडणुकीनंतर टीएमसीवाल्यांनी तर कार्यालयास कुलूपही लावले असे म्हणत घणाघात केला आहे.

तसेच निंबाळकर यांनी, आपचे आमदार निवडून आले आहेत. पण त्यांचे प्रदेशाध्यक्ष (अमित पालेकर यांचे नाव न घेता) दिल्लीच्या निवडणुकीनंतर काँग्रेसवर टीका करत आहेत. तुम्ही तुमचे घर सांभाळा, आम्ही आमचं बघू, असा सल्लाही आपला दिला आहे.

दिल्लीला तुमची गत काय झाली आहे. तशीच गत तुम्हाला गोव्यातही करून घ्यावयाची आहे? असा सवाल करताना निंबाळकर यांनी, तुमची तशी इच्छा असेल तर आम्ही स्वागत करतो. आपबरोबर जनमत राहिलेले नाही. गोव्यात लोकांचा आशीर्वाद काँग्रेसबरोबर राहिल्याचेही निंबाळकर म्हणाल्या.