Congress leader hospitalised : काँग्रेसच्या ज्येष्ठ नेत्याची अचानक प्रकृती खालावली! तातडीने रुग्णालयात दाखल; समर्थकांसह पक्षातील सहकाऱ्यांची चिंता वाढली

V Hanumantha Rao News : काँग्रेसचे ज्येष्ठ नेते व्ही. हनुमंत राव यांची अचानक प्रकृती खालावल्याने त्यांना तातडीने शनिवारी (ता.२७) रूग्णालयात दाखल करण्यात आले आहे. या बातमीनंतर काँग्रेससह राजकीय वर्तुळात खळबळ उडाली असून काँग्रेच्या नेत्यांनी हैदराबाद येथील एशियन इन्स्टिट्यूट ऑफ नेफ्रोलॅाजी अँड युरोलॉजीकडे (AINU) धाव घेतली आहे. किडनीशी संबंधित जुन्या आजाराचा त्रास त्यांना सोमवारी रात्री उशिरा जाणवू लागला होता. ज्यानंतर आज त्यांची अचानक प्रकृती खालावल्यानंतर कुटुंबीयांनी त्यांना तात्काळ रूग्णालयात दाखल केले आहे. त्यांच्यावर तात्काळ अत्याधुनिक उपचार सुरू केले जात आहेत.

वैद्यकीय सूत्रांनुसार, व्ही हनुमंत राव यांना अशा गंभीर आरोग्य समस्येचा सामना पहिल्यांदाच करावा लागत नसून यापूर्वीही त्यांना अशाच प्रकारच्या किडनीच्या समस्येमुळे रुग्णालयात दाखल करण्यात आले होते. एका तज्ज्ञ नेफ्रोलॉजिस्टच्या देखरेखीखाली झालेल्या सघन उपचारानंतर ते पूर्णपणे बरे झाले होते.

आता पुन्हा एकदा त्यांना रुग्णालयात दाखल केल्यानंतर, त्यांच्यावर उपचार करण्यासाठी वरिष्ठ डॉक्टरांचे एक विशेष पथक तयार करण्यात आले. जे त्यांच्यावर बारकाईने लक्ष ठेवून असून त्यांची तपासणी करत आहे.

दरम्यान राव यांच्यावर उपचार करणारे वरिष्ठ सल्लागार नेफ्रोलॉजिस्ट डॉ. राजेश नायर यांनी रुग्णालयाबाहेर त्यांच्या प्रकृतीबाबत अधिकृत माहिती दिली. त्यांनी सांगितले की, रुग्णालयात आणल्यावेळी त्यांच्या किडनीचे कार्य व्यवस्थित होत नव्हते. मात्र प्राथमिक उपचारांना चांगला प्रतिसाद मिळत आहे.

सध्या किडनीचे कार्य सुधारण्यासाठी आवश्यक औषधे दिली जात असून पुढील 48 तास त्यांच्यावर बारकाईने लक्ष ठेवले जाणार आहे. तर व्ही. हनुमंत राव रुग्णालयात दाखल केल्याची बातमी वाऱ्यागत पसरली असून राजकीय वर्तुळात खळबळ उडाली आहे.

तर या बातमीमुळे त्यांच्या समर्थकांमध्ये आणि पक्षातील सहकाऱ्यांमध्ये चिंता व्यक्त केली जात आहे. तर विविध राजकीय पक्षांचे अनेक वरिष्ठ नेते त्यांच्या प्रकृतीची चौकशी करण्यासाठी रुग्णालयात येत आहेत.