माझ्या दहा पिढ्या बसून खातील एवढं कमावलय पण राजकारणात येऊन मी चूक केली!

बंगळूर : विधान परिषदेच्या (Legislative Council) निवडणुकीची धामधूम कर्नाटकात (Karnataka) सुरू आहे. बंगळूर शहर मतदारसंघातून विधान परिषदेसाठी काँग्रेसने (Congress) युसूफ शरीफ (Yusf Sharif) यांना उमेदवारी जाहीर केली आहे. शरीफ हे राज्यातील सर्वांत श्रीमंत राजकारणी मानले जात आहेत. परंतु, आता त्यांना राजकारणात आल्याचा पश्चाताप होऊ लागला आहे.

शरीफ हे अब्जाधीश आहेत. ते सुरवातीला भंगार व्यावसायिक होते. त्यांनी उमेदवारी अर्ज भरताना आता त्यांची संपत्ती जाहीर केली असून, त्यांची एकूण मालमत्ता 1 हजार 744 कोटी रुपये आहे. शरीफ हे भंगारवाले या नावाने परिचित आहेत. परंतु, उमेदवारी जाहीर होण्यापूर्वी पक्षीय वर्तुळात त्यांच्याबद्दल फारशी माहिती नव्हती. त्यांचे नाव जाहीर झाल्यानंतर सगळ्यांनाच धक्का बसला होता.

शरीफ यांच्याविरोधात आता भाजपने आघाडी उघडली आहे. मंत्री टी.सोमशेखर यांनी शरीफ यांच्यावर व्यक्तिगत स्वरुपाचे आरोप केले होते. शरीफ यांनी त्यांच्या मुलीचा छळ केला असून, त्यांच्या पत्नीनेच याची तक्रार केली होती, असा गंभीर आरोप सोमशेखर यांनी केला होता. यावर शरीफ यांनी पत्नी आणि कुटुंबीयांसोबत पत्रकार परिषद घेऊन बाजू मांडली. त्यावेळी त्यांना अश्रू अनावर झाले. ते म्हणाले की, मला आता राजकारणात आल्याचा पश्चाताप होत आहे. माझ्या दहा पिढ्यांना पुरेल एवढी संपत्ती मी कमावून ठेवली आहे. मी राजकारणात येऊन चूक केली.

शरीफ यांच्याकडे स्थावर मालमत्ता 1 हजार 643 कोटी रुपये, जंगम मालमत्ता 97.98 रुपये आणि कर्ज 67.24 कोटी रुपयांचे आहे. त्यांच्या पहिल्या पत्नीकडे स्थावर मालमत्ता 1.30 कोटी रुपये आणि जंगम मालमत्ता 98.96 लाख रुपये आहे. त्यांच्या दुसऱ्या पत्नीकडे जंगम मालमत्ता 32.22 लाख रुपये आहे. इतर मालमत्ता त्यांच्या मुलांच्या नावावर आहे.

शरीफ हे मूळचे कोलार गोल्ड फिल्ड्स येथील आहेत. त्यांचे शिक्षण पाचवीपर्यंत झाले असून, ते सरकारी शाळेत झाले आहे. त्यांना दोन पत्नी आणि पाच मुले आहेत. त्यात एक मुलगी आणि पाच मुलांचा समावेश आहे. शरीफ यांच्याकडे 3 कोटी रुपयांच्या मोटारी आहेत. यात एक रोल्स रॉईस आणि दोन फॉर्च्युनर मोटारींचा समावेश आहे. अब्जाधीश उमेदवाराला काँग्रेसने अचानक विधान परिषदेची उमेदवारी दिल्याने सगळ्यांच्या भुवया उंचावल्या आहेत.