Union Budget 2024 : निर्मला सीतारमण यांचं ‘बजेट’ ठरणार ऐतिहासिक; नवा विक्रम करणार...

New Delhi : मोदी सरकारच्या तिसऱ्या टर्ममधील पहिले बजेट मंगळवारी मांडले जाणार आहे. केंद्रीय अर्थमंत्री निर्मला सीतारमण यांच्याकडून हे बजेट मांडले जाईल, त्यावेळी एक नवा विक्रम त्यांच्या नावावर होणार आहे. माजी अर्थमंत्री मोरारजी देसाई यांचा विक्रम त्या मोडणार आहे. त्यामुळे हे बजेट ऐतिहासिक ठरणार आहे.

संसदेचे पावसाळी अधिवेशन सोमवारपासून सुरू होत आहे. या अधिवेशन सीतारमण या सलग सातव्यांदा बजेट सादर करणार आहे. असे करणाऱ्या त्या देशाच्या पहिल्या अर्थमंत्री असतील. यापूर्वी मोरारजी देसाई यांनी पाचवेळा नियमित तर एकदा अंतरिम बजेट सादर केले आहे. ते 1959 ते 1964 या काळात अर्थमंत्री होते.

सीतारमण या पहिल्या महिला अर्थमंत्री आहेत. तसेच त्यांच्याच काळात पहिल्यांदाच पेपरलेस बजेट सादर करण्यात आले होते. त्यानंतर आता त्या आणखी एक विक्रम करण्यासाठी सज्ज झाल्या आहेत. यावेळचे बजेटही पेपरलेस असेल. त्यांनी 1 फेब्रुवारी 2024 रोजी लोकसभा निवडणुकांआधी अंतरिम बजेट मांडले होते.

सीतारमण यांनी अर्थमंत्रिपदाचा भार स्वीकारल्यापासूनच बजेटचे काम सुरू केले आहे. त्यांनी उद्योजक, व्यावसायिक प्रतिनिधी, शिक्षण, आरोग्य, लघु उध्योग, अर्थतज्ज्ञांसह विविध घटकांतील तज्ज्ञांशी चर्चा केल्या आहेत. बजेटमध्ये कोणत्या मुद्यांवर भर द्यायला हवा, कोणत्या योजना असाव्यात, विविध मंत्रालयांच्या मागण्या, नव्या-जून्या योजना, त्यांना निधी या पातळीवर त्यांचे काम सुरू आहे.

निर्मला सीतारमण आपल्या ऐतिहासिक बजेटमधील कुणाल काय देणार, याबाबत उत्सुकता वाढली आहे. विशेषत: शेतकरी, युवक आणि नोकरदार वर्गाचे लक्ष या बजेटकडे लागले आहे. आधारभूत किंमत, रोजगार, प्राप्तीकर मर्यादा याबाबत मोठ्या घोषणा होण्याची शक्यता आहे. त्याचप्रमाणे महागाईनेही पुन्हा डोके वर काढल्याने गृहिणींनाही या बजेटमधून मोठ्या अपेक्षा असणार आहेत.  

महाराष्ट्राची निवडणूक पुढील काही दिवसांवर येऊन ठेपली आहे. त्याअनुषंगाने राज्याला नवीन प्रकल्प, शैक्षणिक संस्था, उद्योग मिळणार का, हे महत्वाचे ठरणार आहे. तसेच वंदे भारत ट्रेन, नवीन रेल्वे गाड्या, नवे रेल्वे मार्ग, नवे रस्ते प्रकल्प आपल्या पोतडीतून बाहेर काढणार का, याचीही उत्सुकता असेल.