Governor Appointments : मोदींकडून चंद्राबाबूंना मोठं गिफ्ट; बड्या नेत्याची राज्यपालपदी बढती...

Rashtrapati Bhavan announcements : आंध्र प्रदेशचे मुख्यमंत्री चंद्राबाबू नायडू यांना सोमवारी पंतप्रधान नरेंद्र मोदी यांच्याकडून मोठं गिफ्ट मिळालं आहे. नायडू यांच्या तेलगू देसम पक्षातील सर्वात ज्येष्ठ आणि बड्या नेत्याची राज्यपालपदी नियुक्ती करण्यात आली आहे. राष्ट्रपती द्रौपदी मुर्मू यांनी दोन राज्यांचे राज्यपाल आणि एका केंद्रशासित प्रदेशात नायब राज्यपालांच्या नियुक्तीला मंजुरी दिली आहे.

राष्ट्रपतींनी केलेल्या नियुक्तीनुसार टीडीपीचे नेते व माजी केंद्रीय हवाई वाहतूक मंत्री पुसापती अशोक गजापती राजू यांची गौव्याच्या राज्यपालपदी नियुक्ती करण्यात आली आहे. ते 16 व्या लोकसभेत मोदी सरकारमध्ये कॅबिनेट मंत्री होते. तसेच आंध्र प्रदेशातही त्यांनी राज्य सरकारमध्ये अनेक मंत्रिपदे भूषविली आहेत. राज्यातील ज्येष्ठ आणि मातब्बर नेत्यांमध्ये त्यांची गणना होते.

पीएस श्रीधरन पिल्लई हे 2021 पासून गोव्याचे राज्यपाल होते. आता पुसापती अशोक गजापती राजू या पदाचा कार्यभार सांभाळतील. गोव्याप्रमाणेच हरियाणालाही नवे राज्यपाल मिळाले आहे. प्रोफेसर असिम कुमार घोष यांची हरियाणाच्या राज्यपालपदी नियुक्ती करण्यात आली आहे. ते पश्चिम बंगालमधील आहेत.

पुढील वर्षी बंगालमध्ये विधानसभेची निवडणूक आहे. यापार्श्वभूमीवर घोष यांच्यासारख्या प्रसिध्द शिक्षणतज्ज्ञ आणि राजकीय विचारवंताची या मोठ्या पदावर नियुक्ती करण्यात आल्याची चर्चा आहे. बंडारू दत्तात्रेय हे 2021 पासून हरियाणाचे राज्यपाल होते. पिल्लई यांच्यासह बंडारू दत्तात्रेय यांची कुठेही नियुक्ती करण्यात आलेली नाही.

राष्ट्रपतींनी लडाख या केंद्रशासित प्रदेशाच्या नव्या नायब राज्यपालांचीही नियुक्ती केली आहे. भाजपचे जम्मू आणि काश्मीरमध्ये ज्येष्ठ नेते व माजी उपमुख्यमंत्री कविंदर गुप्ता यांना या पदावर संदी देण्यात आली आहे. राष्ट्रपतींनी ब्रिगेडिअर (निवृत्त) बी. डी. मिश्रा यांचा नायब राज्यपाल पदाचा राजीनामा मंजूर केल्यानंतर गुप्ता यांची नियुक्त केली आहे.