PM Narendra Modi : नरेंद्र मोदींची ढाल बनले होते त्यांचे राजकीय गुरू! 22 वर्षांपूर्वी काय घडलं?

New Delhi : पंतप्रधान नरेंद्र मोदी हे गुजरातचे मुख्यमंत्री असताना दंगलीच्या मुद्यावरून त्यांचे पद धोक्यात आले होते. तत्कालीन पंतप्रधान अटलबिहारी वाजपेयी त्यांच्यावर प्रचंड नाराज झाले होते. मोदींच्या राजीनाम्याचे संकेत मिळत होते. पण त्यांचे राजकीय गुरू ढाल बनून समोर उभे ठाकले अन् त्यांच्या पाठिशी उभे राहिले. ही ढाल होती ज्येष्ठ नेते लालकृष्ण अडवाणी यांची...

पंतप्रधान मोदी अडवाणींना आपले राजकीय गुरू मानतात. याबाबत त्यांनी अनेकदा उल्लेखही केला आहे. मोदींना गुजरातमधील राजकारणात सक्रीय करण्याचे काम अडवाणी यांनीच केल्याचे बोलले जाते. अडवाणींमुळे ते भाजपमध्ये आले आणि 1990 मध्ये मोदी त्यांचे सारथी बनले. राम मंदिरासाठी अडवाणी यांनी देशभरात रथयात्रा काढली. त्याची जबाबदारी मोदींच्या हातात दिली होती. अडवाणींचे ते सारथी बनले होते.

2002 मध्ये गुजरातमधील दंगलींनंतर मोदींच्या नेतृत्वावर काही नेत्यांकडून नाराजी व्यक्त करण्यात आली होती. त्यावेळी केंद्रातही भाजपचे सरकार होते. दिवंगत अटल बिहारी वाजपेयी पंतप्रधान होते. दंगलीनंतर वाजपेयींनी मोदींनी राजधर्माचे पालन करण्याचा सल्ला दिला होता. त्यावेळी मोदींनी राजीनामा द्यावा, असे वाजपेयींना वाटत होते. पण अडवाणी यांचा त्याला विरोध होता.

अडवाणी यांनी ‘माय कंट्री माय लाईफ’ या आपल्या आत्मचरित्रात त्याचा उल्लेख केला आहे. गुजरात दंगलीबाबत मोदींच्या राजीनाम्याच्या मागणीवर आपण वाजपेयींशी सहमत नव्हतो, असे अडवाणी यांनी त्याते लिहिले आहे. गोध्रा दंगलीनंतर विरोधी पक्ष मुख्यमंत्री नरेंद्र मोदींच्या राजीनाम्यावर अडून बसले होते. एनडीएतील काही पक्षही मोदींचा राजीनामा मागत होते. पण माझे मत त्याउलट होते, असे अडवाणी यांनी आत्मचित्रात म्हटले आहे.

गुरूदक्षिणा दिली...

लालकृष्ण अडवाणी यांना काही महिन्यांपूर्वीच भारतरत्न हा देशातील सर्वोच्च किताब देऊन सन्मानित करण्यात आले. मोदींची ही गुरूदक्षिणा असल्याची चर्चा त्यावेळी होती. लोकसभा निवडणुकीला सामोरे जाण्याआधी अडवाणींचा सन्मान करण्यात आला होता. त्यानंतर तिसऱ्यांदा एनडीएची सत्ता आल्यानंतर शपथविधीपूर्वी मोदींनी आपल्या गुरूची भेट घेऊन त्यांचे आशीर्वाद घेतले होते.