BJP Government news : हरियाणातील भाजप सरकार कोसळणार? विधानसभेत अविश्वास ठराव, जाणून घ्या आमदारांचं गणित...

No confidence motion Haryana : हरियाणातील भाजप सरकारविरोधात विरोधकांनी अविश्वासदर्शक ठराव दाखल केला आहे. विधानसभा अध्यक्षांनीही हा ठराव दाखल करून घेतल्याने आता त्यावर चर्चा करण्यास मुख्यमंत्री नायब सिंह सैनीही यांनीही तयारी दर्शविली आहे. त्यामुळे आता याकडे संपूर्ण देशाचे लक्ष लागले आहे. हरियाणा विधानसभेचे हिवाळी अधिवेशन गुरूवारपासून सुरू झाले असून विरोधकांनी पहिल्याच दिवशी ठराव दाखल केल्याने सरकारला धक्का बसला.

हरियाणातील नायब सैनी यांच्या सरकारकडे सध्यातरी पुरेसे संख्याबळ आहे. त्यामुळे सरकारला कसलाही धोका नसल्याचे सांगितले जात आहे. शुक्रवारी विधानसभेचे कामकाज सुरू झाल्यानंतर विधानसभा अध्यक्षांनी चर्चेसाठी वेळ निश्चित केली. त्यावर बोलताना मुख्यमंत्री सैनी यांनी अविश्वास प्रस्तावावरच आक्षेप घेतला. या प्रस्तावावर विरोधी पक्षनेते भूपेंद्र सिंह हुड्डा यांचीच सही नसल्याने हा प्रस्ताव परंपरेनुसार नसल्याचे ते म्हणाले.

हुड्डा यांनी त्यावर प्रत्युत्तर देताना अविश्वास प्रस्तावासाठी १८ आमदारांच्या सह्या असणे गरजेचे असल्याचे सांगितले. दरम्यान, हरियाणा विधानसभेमध्ये एकूण ९० आमदार आहेत. २०२४ मध्ये झालेल्या निवडणुकीत भाजपला ४८ जागा मिळाल्या होत्या. बहुमतासाठी ४६ जागांची गरज होती. बहुमतापेक्षा दोन आमदार अधिक असल्याने भाजपची सत्ता आली. तीन अपक्ष आमदारांनीही नंतर भाजप सरकारला पाठिंबा दिला.

सैनी सरकारला सध्या ५१ आमदारांचा पाठिंबा असून कोणताही धोका नसल्याचा दावा भाजप नेत्यांनी केला आहे. त्यामुळे काँग्रेसच्या प्रस्तावावर आश्चर्य व्यक्त केले जात आहे. यापूर्वीही मागील चार वर्षांत दोनदा अविस्वास प्रस्ताव दाखल करण्यात आला होता. दोन्हीवेळेला विरोधकांच्या पदरी निराशा पडली. १० मार्च २०२१ मध्ये खट्टर सरकारविरोधात आणि २२ फेब्रुवारी २०२४ मध्ये सैनी सरकारविरोधात प्रस्ताव दाखल करण्यात आला होता.

२०१९ मध्ये झालेल्या विधानसभा निवडणुकीत भाजपला ४० जागा मिळाल्या होत्या. जेजेपी पक्षाच्या १० आमदारांना सोबत घेत भाजपने सत्ता काबीज केली होती. त्यानंतर जेजेपीने सरकारचा पाठिंबा काढून घेतल्याने सरकार डळमळीत झाले होते. मात्र, भाजपने जेजेपीचे काही आमदार फोडत पुन्हा सत्ता मिळविण्यात यश मिळविले होते. २०२४ च्या निवडणुकीत भाजपला पुन्हा सत्ता मिळाली आहे.