Sarpanch : ऐकावं तर नवलचं : गावकऱ्यांचे असेही प्रेम ; नवनियुक्त सरपंचासाठी ११ लाखाचा हार !

Sarpanch : ग्रामपंचायत निवडणुकीचा एक फोटो सध्या समाजमाध्यमांवर सगळ्याचे लक्ष वेधून घेत आहे. तो फोटो आहे फतेहपुर (हरियाणा) येथील नवनिर्वाचित सरपंचाचा. सरपंच म्हणून निवडून आल्यावर गावकऱ्यांची त्यांना मोठी भेट दिली. (Haryana panchayat election 2022 News update)

पाचशे रुपयांच्या नोटा असलेला एकूण ११ लाख रुपयांचा हार गावकऱ्यांनी आपल्या नव्या सरपंचाच्या गळ्यात घातला, त्याचा फोटो सध्या व्हायरल होत आहे. आस मोहम्मद असे या सरपंचाचे नाव आहे. गावकऱ्यांनी त्यांना परिधान केलेल्या या ११ लाखांच्या हाराची सध्या जोरदार चर्चा आहे.

या हाराची लांबी मोठी असल्याने तो परिधान करण्यासाठी सरपंच आसा मोहम्द यांना आपल्या घराच्या पहिल्या मजल्यावर उभे राहावे लागले, त्यानंतर गावकऱ्यांनी मोठ्या उत्साहाने त्यांना हा ११ लाखांचा हार घातला.

पहिल्या मजल्यावर ११ लाखांचा हार परिधान केलेले सरपंच गावकऱ्यांच्या शुभेच्छा स्वीकारत त्यांचे आभार मानत असल्याचा व्हिडिओ माध्यमावर व्हायरल झाला आहे. आतापर्यंत फुलांचा हार घातल्याचे आपण पाहिले असेल पण या ११ लाखांच्या हारामुळे हे गाव चर्चेत आले आहे.

हरियाणामध्ये सध्या ग्रामपंचायतीची रणधुमाळी सुरु आहे.शनिवारी ग्रामपंचायतीचा निकाल जाहीर झाला. त्यात आसा मोहम्मद यांची सरपंच म्हणून घोषणा करण्यात आली. त्यानंतर त्यांच्या समर्थकांनी एकच जल्लोष केला.त्यानंतर काही वेळाने त्यांना हा ११ लाखांचा हार परिधान करण्यात आला.