Muhammad Yunus : यूनुस यांचा शेख हसीना यांना निर्वाणीचा इशारा; म्हणाले, भारतात राहायचे असेल तर...

New Delhi : बांगलादेशातील अंतरिम सरकारचे प्रमुख मोहम्मद यूनुस यांनी माजी पंतप्रधान शेख हसीना यांना निर्वाणीचा इशारा दिला आहे. भारतात राहून बांगलादेशविरोधात राजकीय विधाने करत असलेल्या हसीना यांनी गप्प राहावे, असे यूनुस यांनी म्हटले आहे.

एका मुलाखतीमध्ये बोलताना यूनुस यांनी पहिल्यांदाच एवढ्याच कडक शब्दांत हसीना यांना स्पष्ट संदेश दिला आहे. शेख हसीना भारतातून राजकीय भाष्य करत आहेत. हे योग्य नाही. दोन्ही देशांमधील सौहार्द कायम राहावे, यासाठी त्यांनी शांत राहावे, असे यूनुस यांनी स्पष्ट केले आहे.

बांगलादेश सरकारला त्या परत हव्या असेपर्यंत जर भारताला त्यांना तिथे ठेवायचे असेल तर त्यांना गप्प बसावेच लागेल, असे इशारा यूनुस यांनी दिला आहे. युनूस यांनी ‘पीटीआय’ला दिलेल्या मुलाखतीत हे विधान केले आहे. हसीना यांच्या भूमिकेवरही भारतातही कुणी समाधानी नाही. अडचणीच्या काळात त्या बोलत आहेत. तिथे बसून सूचना करत आहेत. हे कुणालाही आवडलेले नाही, असेही यूनुस यांनी म्हटले आहे.

हसीना यांनी 13 ऑगस्ट रोजी बांगलादेशातील हिंसेवर भाष्य केले होते. नुकत्याच झालेल्या दहशतवादी कृत्यामध्ये सहभागी असलेल्यांची चौकशी व्हायला हवी. त्यांनी ओळख पटवून शिक्षा करायला हवी. न्याय मिळायला हवे, असे हसीना म्हणाल्या होत्या. त्यावरून भारताकडेही आपली भूमिका मांडल्याचे यूनुस यांनी स्पष्ट केले.

शेख हसीना यांना भारतात आसरा दिला आहे आणि त्या तिथून मोहिम चालवत आहेत. त्या चांगल्या वातावरणात तिथे गेलेल्या नाहीत. लोकांच्या रोषानंतर त्या पळून गेल्या आहेत, याकडेही यूनुस यांनी लक्ष वेधले. अत्याचारग्रस्त लोकांना न्याय देण्यासाठी आमचे सरकार कटिबध्द आहे. त्यांनी ज्यापध्दतीने अत्याचार केले आहेत, त्यासाठी त्यांना बांगलादेशात परत आणावे लागेल अन्यथा येथील लोकांना शांतता मिळणार नाही, असेही यूनुस म्हणाले आहेत.