Rahul Gandhi : नरेंद्र मोदी पूर्वीसारखे राहिले नाहीत, ते..! राहुल गांधी असं का म्हणाले?

New Delhi : जम्मू-काश्मीर विधानसभा निवडणुकीचा प्रचार शिगेला पोहचला असून सर्वच पक्षांतील नेत्यांकडून विरोधकांवर शरसंधान साधले जात आहे. काँग्रेसचे नेते व लोकसभेतील विरोधी पक्षनेते राहुल गांधी यांनी सोमवारी पंतप्रधान नरेंद्र मोदींवर टीका केली.

पुंछमधील सभेत बोलताना राहुल गांधी यांनी दावा केला की, 56 इंचाची छाती असलेले पंतप्रधान मोदी जे तुम्ही पाहिले होते, तसे ते आता राहिले नाहीत. त्यांना आम्ही मानसिकदृष्ट्या तोडले आहे. मी संसदेत त्यांच्या समोर उभार राहतो. त्यामुळे मला हे स्पष्टपणे दिसत आहे. आज विरोधकांना जे करून घ्यायचे आहे, ते आम्ही करतो.

सरकार कायदा आणते, आम्ही त्याविरोधात उभे राहतो. ते कायदा पास करू शकत नाही. नवीन कायदा आणतात. जो आत्मविश्वास होता तो आता संपला आहे, अशी टीका राहुल यांनी केली. सरकारने मागील अधिवेशनात आणलेले वक्फ बोर्ड सुधारित विधेयक विरोधामुळे संयुक्त संसदीय समितीकडे पाठवावे लागले आहे.   

नायब राज्यपालांवर टीका करताना राहुल म्हणाले, जम्मू-काश्मीरमधील लोक आमदारांची निवड करत आपले निर्णय घेत होते. पण आता एक राजा निवडण्यात आला आहे. राज्यपाल (एलजी) एक राजाप्रमाणे आहेत. ते बाहेरचे व्यक्ती आहेत. त्यामुळे ते काश्मिरच्या लोकांच्या मनातील काम करू शकत नाहीत.

माझी गरज असेल तेव्हा मला आदेश द्या, मी येथे नक्की येईन, असे आवाहन करत राहुल गांधी म्हणाले, जम्मू-काश्मीरशी माझे राजकीय नाते नाही. तुमच्याशी माझे रक्ताचे, प्रेमाचे नाते आहे. जम्मू-काश्मीरमधील लोकांना त्यांचे हक्क मिळवून द्यायचे आहेत. काश्मीरला राज्याचा दर्जा मिळवून देऊ, असे आश्वासन राहुल यांनी सभेत बोलताना दिले.

नरेंद्र मोदी मोठी-मोठी भाषणे देतात, पण कामाचे बोलत नाहीत. बेरोजगारी, महागाई, युवकांचे व्हिजन, काश्मीरला राज्याचा दर्जा यावर ते बोलत नाहीत. ते फक्त मन की बात करतात. ते ऐकण्याची कुणाचीही इच्छा नसते, असा टोला राहुल यांनी लगावला.