Kurnool Bus Fire : ऐन दिवाळीत भीषण दुर्घटना; 40 प्रवाशांना घेऊन जाणारी बस जळून खाक, 11 जणांचा होरपळून मृत्यू

Andhra Pradesh Kurnool Bus Fire : ऐन दिवाळीत आंध्र प्रदेशमधील कुर्नूलमध्ये भीषण दुर्घटना घडली आहे. एक बाईक व्होल्वो बसला येऊन धडकल्यामुळे बसने अचानक पेट घेतला आणि या आगीत जवळपास 11 जणांचा होरपळून मृत्यू झाल्याची माहिती समोर आली आहे.

ही घटना गुरुवारी रात्री घडली असून बस पूर्णपणे जळून खाक झाल्यामुळे प्रवासी गंभीररित्या भाजले आहेत. त्यामुळे मृत्यू झालेल्यांची संख्या वाढण्याची भिती व्यक्त केली जात आहे. या बसमध्ये एकूण 40 प्रवासी होते. तर ही बस हैदराबादवरून बंगळुरूकडे जात होती.

नेमकं काय घडलं?

पोलिसांनी सांगितलं की, हैदराबादवरून बंगळुरूकडे निघालेल्या एका बसला बाईक धडकल्यामुळे बसने अचानक पेट घेतला. काही मिनिटांत बस जळून खाक झाली. बाईकच्या धडकेत बसची बसच्या इंधनाची टाकी फुटल्यामुळे ही आग लागल्याचा प्राथमिक शंका व्यक्त केली जात आहे.

दरम्यान, आंध्र प्रदेशातील या बस दुर्घटनेबाबत मुख्यमंत्री चंद्राबाबू नायडू यांनी शोक व्यक्त केला आहे. ते म्हणाले, कर्नूल जिल्ह्यातील चिन्ना टेकूर गावाजवळील बस आगीची दुर्घटना ऐकून मला धक्का बसला. ज्यांनी आपल्या प्रियजनांना गमावलं आहे, त्यांच्या कुटुंबियांबद्दल माझ्या मनापासून संवेदना आहेत. या घटनेतबाधित कुटुंबांना सरकारकडून सर्वतोपरी मदत केली जाईल.

तर आंध्र प्रदेशचे माजी मुख्यमंत्री जगन मोहन रेड्डी यांनी देखील या दुर्घटनेत मृत्यू झालेल्या कुटुंबियांबद्दल मनापासून संवेदना व्यक्त करत. या दुर्दैवी घटनेत जखमी झालेल्यांना आवश्यक ती सर्व मदत करण्याची सरकारला विनंती केली आहे.